koi bahaar ki KHatir koi KHizan ke liye

koī bahār kī ḳhātir koī ḳhizāñ ke liye

bas ek maiñ hī rahā sirf gulsitāñ ke liye

ilāhī mujh se nazar chhīn le ki ahl-e-nazar

tamām-umr taḌapte haiñ rāz-dāñ ke liye

masarrateñ jo milīñ tere lutf-e-paiham se

machal rahī haiñ kisī jaur-e-nā-gahāñ ke liye

mujhe haiñ ḳhaar se kuchh ḳhaas nisbateñ ki ye gul

bahār meñ na khilā raunaq-e-ḳhizāñ ke liye

hameñ un ahl-e-suḳhan meñ na kar shumār ki ye

fuġhāñ bhī karte haiñ ḳhush-vaqtī-e-fuġhāñ ke liye

kareñ na zikr tumhārā to kyā kareñ ki hameñ

kuchh aur mil na sakā apnī dāstāñ ke liye

hamāre des meñ iran-o-najd se ustād

bulā.e jaate haiñ ta.alīm-e-āshiqāñ ke liye

hamāre shahr meñ fan ke ijāra-dāroñ ne

kuchal rakhā hai diloñ ko faqat zabāñ ke liye

ham apne des aur apne hī shahr meñ 'ālī'

gadā-gadī pe haiñ majbūr soz-e-jāñ ke liye

koi bahaar ki KHatir koi KHizan ke liye

bas ek main hi raha sirf gulsitan ke liye

ilahi mujh se nazar chhin le ki ahl-e-nazar

tamam-umr taDapte hain raaz-dan ke liye

masarraten jo milin tere lutf-e-paiham se

machal rahi hain kisi jaur-e-na-gahan ke liye

mujhe hain KHar se kuchh KHas nisbaten ki ye gul

bahaar mein na khila raunaq-e-KHizan ke liye

hamein un ahl-e-suKHan mein na kar shumar ki ye

fughan bhi karte hain KHush-waqti-e-fughan ke liye

karen na zikr tumhaara to kya karen ki hamein

kuchh aur mil na saka apni dastan ke liye

hamare des mein iran-o-najd se ustad

bulae jate hain talim-e-ashiqan ke liye

hamare shahr mein fan ke ijara-daron ne

kuchal rakha hai dilon ko faqat zaban ke liye

hum apne des aur apne hi shahr mein 'ali'

gada-gadi pe hain majbur soz-e-jaan ke liye