koi batae ki ye rang-e-dosti kya hai

koī batā.e ki ye rañg-e-dostī kyā hai

vo shaḳhs pūchh rahā hai ki dilbarī kyā hai

ga.e dinoñ ke tabassum kī raakh bikhrī hai

havā-e-shahr mire dil meñ DhūñDhtī kyā hai

fasīl-e-jism pe taanī hai karb kī chādar

ham ahl-e-dard se pūchho ki zindagī kyā hai

sitam kī lahr chalī aa mujhe gale se lagā

mire vajūd ke āñgan meñ sochtī kyā hai

vo dhaḌkanoñ ke talātum se āshnā hī nahīñ

use ḳhabar hī nahīñ hai ki shā.irī kyā hai

jo mah-vashoñ kī jabīnoñ se phūTtī hai 'niyāz'

parakh sako to parakh lo vo raushnī kyā hai

koi batae ki ye rang-e-dosti kya hai

wo shaKHs puchh raha hai ki dilbari kya hai

gae dinon ke tabassum ki rakh bikhri hai

hawa-e-shahr mere dil mein DhunDhti kya hai

fasil-e-jism pe tani hai karb ki chadar

hum ahl-e-dard se puchho ki zindagi kya hai

sitam ki lahr chali aa mujhe gale se laga

mere wajud ke aangan mein sochti kya hai

wo dhaDkanon ke talatum se aashna hi nahin

use KHabar hi nahin hai ki shairi kya hai

jo mah-washon ki jabinon se phuTti hai 'niyaz'

parakh sako to parakh lo wo raushni kya hai