koi bhi rasm ho kuchh ho bahana hota tha

koī bhī rasm ho kuchh ho bahānā hotā thā

na jaane kyā thā ki milnā milānā hotā thā

kisī se milte agar dil se ho ke milte the

ajiib log the kaisā zamāna hotā thā

vo laḌ-jhagaḌ ke bhī ik dūsre pe marte the

ye sab to thā hī magar ānā-jānā hotā thā

koī bhī toḌ nahīñ ahd-e-yād-e-māzī kā

hazār ġham the magar muskurānā hotā thā

ye tarbiyat thī gharoñ meñ har ek beTī ko

kisī bhī haal meñ ho ghar bachānā hotā thā

varaq varaq the kitāboñ ke mo'atabar itne

har ek lafz ko dil meñ basānā hotā thā

agar thā ishq to is meñ bhī aisī shiddat thī

bhañvar meñ aise hī bas kuud jaanā hotā thā

koi bhi rasm ho kuchh ho bahana hota tha

na jaane kya tha ki milna milana hota tha

kisi se milte agar dil se ho ke milte the

ajib log the kaisa zamana hota tha

wo laD-jhagaD ke bhi ek dusre pe marte the

ye sab to tha hi magar aana-jaana hota tha

koi bhi toD nahin ahd-e-yaad-e-mazi ka

hazar gham the magar muskurana hota tha

ye tarbiyat thi gharon mein har ek beTi ko

kisi bhi haal mein ho ghar bachana hota tha

waraq waraq the kitabon ke mo'atabar itne

har ek lafz ko dil mein basana hota tha

agar tha ishq to is mein bhi aisi shiddat thi

bhanwar mein aise hi bas kud jaana hota tha