koi din hoga ki haare hue lauT aaenge hum

koī din hogā ki haare hue lauT ā.eñge ham

terī galiyoñ se ga.e bhī to kahāñ jā.eñge ham

āñsuoñ kā to takalluf hī kiyā āñkhoñ ne

ḳhuun ke ghūñT se kyā shauq na farmā.eñge ham

zindagī pahle hī jiine kī tarah kab jī hai

ab tire naam pe marne kī sazā pā.eñge ham

kab tak ai ahd-e-karam bāñdhne vaale kab tak

dil ko samjhā.eñge bahlā.eñge phuslāñge ham

aah se arsh-e-muallā ko na larzā deñge

tū samajhtā hai qayāmat hī faqat Dhā.eñge ham

laakh murtad sahī be-dīn nahīñ haiñ vaa.iz

but na.e haiñ to ḳhudā kyā na nayā lā.eñge ham

jāvedānī kā tasavvur meñ bhī aayā na ḳhayāl

ham samajhte the tire ishq meñ mar jā.eñge ham

bas ab ai dil ki qasam khaa.ī hai us zālim ne

jo taḌaptā hai use aur bhī taḌpā.eñge ham

duur tujh se to qazā bhī nahīñ le jā.egī

sar bhī āḳhir tirī dīvār se Takrā.eñge ham

bhūltā hī nahīñ ham ko vo sitamgar 'rāhīl'

ḳhaak use yaad na karne kī qasam khā.eñge ham

koi din hoga ki haare hue lauT aaenge hum

teri galiyon se gae bhi to kahan jaenge hum

aansuon ka to takalluf hi kiya aankhon ne

KHun ke ghunT se kya shauq na farmaenge hum

zindagi pahle hi jine ki tarah kab ji hai

ab tere nam pe marne ki saza paenge hum

kab tak ai ahd-e-karam bandhne wale kab tak

dil ko samjhaenge bahlaenge phuslange hum

aah se arsh-e-mualla ko na larza denge

tu samajhta hai qayamat hi faqat Dhaenge hum

lakh murtad sahi be-din nahin hain waiz

but nae hain to KHuda kya na naya laenge hum

jawedani ka tasawwur mein bhi aaya na KHayal

hum samajhte the tere ishq mein mar jaenge hum

bas ab ai dil ki qasam khai hai us zalim ne

jo taDapta hai use aur bhi taDpaenge hum

dur tujh se to qaza bhi nahin le jaegi

sar bhi aaKHir teri diwar se Takraenge hum

bhulta hi nahin hum ko wo sitamgar 'rahil'

KHak use yaad na karne ki qasam khaenge hum