koi gulab yahan par khila ke dekhte hain

koī gulāb yahāñ par khilā ke dekhte haiñ

chalo ḳharāba-e-jāñ ko sajā ke dekhte haiñ

jahāñ ko bhuul ke tum ko bhulā ke dekhte haiñ

ab apne aap ko dil se lagā ke dekhte haiñ

bigaḌ ga.e the jise sun ke vaqt ke tevar

jahāñ ko baat vahī phir sunā ke dekhte haiñ

kabhī kisī kā bhī ehsāñ nahīñ liyā ham ne

ab apne sar pe ye ehsāñ uThā ke dekhte haiñ

bahut dinoñ se koī baat kaam kī na huī

chalo falak ko zamīñ par bichhā ke dekhte haiñ

nazar nazar to ka.ī baar paḌh chuke us ko

ġhazal ko aaj zarā gungunā ke dekhte haiñ

zamāna ham pe bahut der hañs chukā 'aslam'

chalo ab us kī hañsī bhī uḌā ke dekhte haiñ

koi gulab yahan par khila ke dekhte hain

chalo KHaraba-e-jaan ko saja ke dekhte hain

jahan ko bhul ke tum ko bhula ke dekhte hain

ab apne aap ko dil se laga ke dekhte hain

bigaD gae the jise sun ke waqt ke tewar

jahan ko baat wahi phir suna ke dekhte hain

kabhi kisi ka bhi ehsan nahin liya hum ne

ab apne sar pe ye ehsan uTha ke dekhte hain

bahut dinon se koi baat kaam ki na hui

chalo falak ko zamin par bichha ke dekhte hain

nazar nazar to kai bar paDh chuke us ko

ghazal ko aaj zara gunguna ke dekhte hain

zamana hum pe bahut der hans chuka 'aslam'

chalo ab us ki hansi bhi uDa ke dekhte hain