koi haalat nahin ye haalat hai

koī hālat nahīñ ye hālat hai

ye to āshob-nāk sūrat hai

anjuman meñ ye merī ḳhāmoshī

burdbārī nahīñ hai vahshat hai

tujh se ye gāh-gāh kā shikva

jab talak hai basā ġhanīmat hai

ḳhvāhisheñ dil kā saath chhoḌ ga.iiñ

ye aziyyat baḌī aziyyat hai

log masrūf jānte haiñ mujhe

yaañ mirā ġham hī merī fursat hai

tanz pairāya-e-tabassum meñ

is takalluf kī kyā zarūrat hai

ham ne dekhā to ham ne ye dekhā

jo nahīñ hai vo ḳhūb-sūrat hai

vaar karne ko jāñ-nisār aa.eñ

ye to īsār hai 'ināyat hai

garm-joshī aur is qadar kyā baat

kyā tumheñ mujh se kuchh shikāyat hai

ab nikal aao apne andar se

ghar meñ sāmān kī zarūrat hai

aaj kā din bhī 'aish se guzrā

sar se pā tak badan salāmat hai

koi haalat nahin ye haalat hai

ye to aashob-nak surat hai

anjuman mein ye meri KHamoshi

burdbari nahin hai wahshat hai

tujh se ye gah-gah ka shikwa

jab talak hai basa ghanimat hai

KHwahishen dil ka sath chhoD gain

ye aziyyat baDi aziyyat hai

log masruf jaante hain mujhe

yan mera gham hi meri fursat hai

tanz pairaya-e-tabassum mein

is takalluf ki kya zarurat hai

hum ne dekha to hum ne ye dekha

jo nahin hai wo KHub-surat hai

war karne ko jaan-nisar aaen

ye to isar hai 'inayat hai

garm-joshi aur is qadar kya baat

kya tumhein mujh se kuchh shikayat hai

ab nikal aao apne andar se

ghar mein saman ki zarurat hai

aaj ka din bhi 'aish se guzra

sar se pa tak badan salamat hai