koi ho dard musalsal to nind aati hai

koī ho dard musalsal to niiñd aatī hai

badan meñ ho koī halchal to niiñd aatī hai

hameñ sukūn mayassar nahīñ hai ik pal bhī

tumhārī yaad ho pal pal to niiñd aatī hai

talab nahīñ hai kisī aur ḳhush-badan kī hameñ

tumhārā paas ho āñchal to niiñd aatī hai

kabhī na tum se rahī guftugū adhūrī sī

ġhazal ho jab bhī mukammal to niiñd aatī hai

ajiib ḳhauf sā lāhaq hai bastiyoñ se hameñ

qarīb ho koī jangal to niiñd aatī hai

pasand hai hameñ shorish fasād-e-gird-o-navāh

agar ho shahr mo.attal to niiñd aatī hai

badal diyā hai zamāne ne yuuñ hamārā mizāj

sajā huā ho jo maqtal to niiñd aatī hai

kaḌak rahī ho jo bijlī to Dar nahīñ lagtā

garaj rahe hoñ jo bādal to niiñd aatī hai

koī bhī ḳhvāb Darātā nahīñ hai ab 'ātir'

dikhā.ī de hameñ daldal to niiñd aatī hai

koi ho dard musalsal to nind aati hai

badan mein ho koi halchal to nind aati hai

hamein sukun mayassar nahin hai ek pal bhi

tumhaari yaad ho pal pal to nind aati hai

talab nahin hai kisi aur KHush-badan ki hamein

tumhaara pas ho aanchal to nind aati hai

kabhi na tum se rahi guftugu adhuri si

ghazal ho jab bhi mukammal to nind aati hai

ajib KHauf sa lahaq hai bastiyon se hamein

qarib ho koi jangal to nind aati hai

pasand hai hamein shorish fasad-e-gird-o-nawah

agar ho shahr moattal to nind aati hai

badal diya hai zamane ne yun hamara mizaj

saja hua ho jo maqtal to nind aati hai

kaDak rahi ho jo bijli to Dar nahin lagta

garaj rahe hon jo baadal to nind aati hai

koi bhi KHwab Daraata nahin hai ab 'atir'

dikhai de hamein daldal to nind aati hai