koi jab dil pe chha jae samajh lena mohabbat hai

koī jab dil pe chhā jaa.e samajh lenā mohabbat hai

hasīñ manzar jo taḌpā.e samajh lenā mohabbat hai

shajar mad.hosh mausam meñ gale aapas meñ mil jaa.eñ

tumheñ rashk un pe aa jaa.e samajh lenā mohabbat hai

umaḌtī jab nadī koī diloñ kī pyaas bhaḌkā.e

samundar dil meñ lahrā.e samajh lenā mohabbat hai

guloñ pe baiThā bhañvrā dekh kamsin der tak soche

ḳhalā meñ dekh muskā.e samajh lenā mohabbat hai

kisī tanhā shajar par jab koī phūloñ-bharī alhaḌ

latā bal khā ke chaḌh jaa.e samajh lenā mohabbat hai

kisī hamrāz se sun kar koī ek naam pyārā sā

nazar chup-chāp jhuk jaa.e samajh lenā mohabbat hai

kabhī bād-e-sabā ke mast jhoñke kī ḳhushāmad par

kalī muñh pher sharmā.e samajh lenā mohabbat hai

ġhazāla kī tarah āñkheñ binā kāran bhaTaktī hoñ

jo dil be-vaj.h ghabrā.e samajh lenā mohabbat hai

tasavvur meñ khanak kar kaan meñ paa.el kī ik khan-khan

diloñ meñ dard bhar jaa.e samajh lenā mohabbat hai

adhūre chāñd ko badlī sharārat se kabhī chūme

koī man hī meñ muskā.e samajh lenā mohabbat hai

kisī titlī ko uḌtī dekh kar phūloñ se jab apnī

nazar ashkoñ se bhar jaa.e samajh lenā mohabbat hai

koi jab dil pe chha jae samajh lena mohabbat hai

hasin manzar jo taDpae samajh lena mohabbat hai

shajar madhosh mausam mein gale aapas mein mil jaen

tumhein rashk un pe aa jae samajh lena mohabbat hai

umaDti jab nadi koi dilon ki pyas bhaDkae

samundar dil mein lahrae samajh lena mohabbat hai

gulon pe baiTha bhanwra dekh kamsin der tak soche

KHala mein dekh muskae samajh lena mohabbat hai

kisi tanha shajar par jab koi phulon-bhari alhaD

lata bal kha ke chaDh jae samajh lena mohabbat hai

kisi hamraaz se sun kar koi ek nam pyara sa

nazar chup-chap jhuk jae samajh lena mohabbat hai

kabhi baad-e-saba ke mast jhonke ki KHushamad par

kali munh pher sharmae samajh lena mohabbat hai

ghazala ki tarah aankhen bina karan bhaTakti hon

jo dil be-wajh ghabrae samajh lena mohabbat hai

tasawwur mein khanak kar kan mein pael ki ek khan-khan

dilon mein dard bhar jae samajh lena mohabbat hai

adhure chand ko badli shararat se kabhi chume

koi man hi mein muskae samajh lena mohabbat hai

kisi titli ko uDti dekh kar phulon se jab apni

nazar ashkon se bhar jae samajh lena mohabbat hai