koi jhankar hai naghma hai sada hai kya hai

koī jhankār hai naġhma hai sadā hai kyā hai

tū kiran hai ke kalī hai ke sabā hai kyā hai

terī āñkhoñ meñ ka.ī rañg jhalakte dekhe

sādgī hai ki jhijhak hai ki hayā hai kyā hai

ruuh kī pyaas bujhā dī hai tirī qurbat ne

tū koī jhiil hai jharnā hai ghaTā hai kyā hai

naam hoñToñ pe tirā aa.e to rāhat sī mile

tū tasallī hai dilāsa hai duā hai kyā hai

hosh meñ lā ke mire hosh uḌāne vaale

ye tirā naaz hai shoḳhī hai adā hai kyā hai

dil ḳhatāvār-e-nazar pārsā tasvīr-e-anā

vo bashar hai ki farishta hai ḳhudā hai kyā hai

ban ga.ī naqsh jo surḳhī tire afsāne kī

vo shafaq hai ki dhanak hai ki hinā hai kyā hai

koi jhankar hai naghma hai sada hai kya hai

tu kiran hai ke kali hai ke saba hai kya hai

teri aankhon mein kai rang jhalakte dekhe

sadgi hai ki jhijhak hai ki haya hai kya hai

ruh ki pyas bujha di hai teri qurbat ne

tu koi jhil hai jharna hai ghaTa hai kya hai

nam honTon pe tera aae to rahat si mile

tu tasalli hai dilasa hai dua hai kya hai

hosh mein la ke mere hosh uDane wale

ye tera naz hai shoKHi hai ada hai kya hai

dil KHatawar-e-nazar parsa taswir-e-ana

wo bashar hai ki farishta hai KHuda hai kya hai

ban gai naqsh jo surKHi tere afsane ki

wo shafaq hai ki dhanak hai ki hina hai kya hai