koi meayar-e-mohabbat na raha mere baad

koī me.ayār-e-mohabbat na rahā mere ba.ad

har taraf aam haiñ ḳhāsān-e-vafā mere ba.ad

silsila un ke sitam kā na rahā mere ba.ad

badlā badlā sā hai dastūr-e-jafā mere ba.ad

kaun pahnegā gale meñ tirī ulfat kī kamand

kis ke sar hogī tirī zulf-e-dotā mere ba.ad

hoñgī qurbān tire ruḳh pe nigāheñ kis kī

chāñd ho jā.egā haale se judā mere ba.ad

sochtā huuñ ki ba-īñ ālam-e-betābī-e-dil

kaun māñgegā mohabbat kī duā mere ba.ad

daad chāheñge mirī tarah miTā kar kis ko

ishva-o-ġhamza-e-andāz-o-adā mere ba.ad

Thokareñ khātī phiregī shab-e-yaldā-e-firāq

ḳhuun ro.egī har ik taaza balā mere ba.ad

suunī suunī sī hai har mahfil-e-īzā-e-talabī

jaise duniyā meñ koī ġham na rahā mere ba.ad

ḳhīra ho jaatī thī jis se nigah-e-sabr-o-qarār

un ke lab par vo tabassum na rahā mere ba.ad

kyā ḳhabar thī ki maiñ ḳhud saath na dūñgā apnā

gosht ho jā.egā nāḳhun se judā mere ba.ad

fitrat-e-husn ko hai aise sitam-kash kī talāsh

jo vafā par bhī kare uzr-e-ḳhatā mere ba.ad

zard kar degā use merī tabāhī kā ḳhayāl

rañg laayā bhī agar rañg-e-hinā mere ba.ad

un kā dīvāna to kahlānā hai mushkil 'bāsit'

koī dīvāna agar ban bhī gayā mere ba.ad

koi meayar-e-mohabbat na raha mere baad

har taraf aam hain KHasan-e-wafa mere baad

silsila un ke sitam ka na raha mere baad

badla badla sa hai dastur-e-jafa mere baad

kaun pahnega gale mein teri ulfat ki kamand

kis ke sar hogi teri zulf-e-dota mere baad

hongi qurban tere ruKH pe nigahen kis ki

chand ho jaega haale se juda mere baad

sochta hun ki ba-in aalam-e-betabi-e-dil

kaun mangega mohabbat ki dua mere baad

dad chahenge meri tarah miTa kar kis ko

ishwa-o-ghamza-e-andaz-o-ada mere baad

Thokaren khati phiregi shab-e-yalda-e-firaq

KHun roegi har ek taza bala mere baad

suni suni si hai har mahfil-e-iza-e-talabi

jaise duniya mein koi gham na raha mere baad

KHira ho jati thi jis se nigah-e-sabr-o-qarar

un ke lab par wo tabassum na raha mere baad

kya KHabar thi ki main KHud sath na dunga apna

gosht ho jaega naKHun se juda mere baad

fitrat-e-husn ko hai aise sitam-kash ki talash

jo wafa par bhi kare uzr-e-KHata mere baad

zard kar dega use meri tabahi ka KHayal

rang laya bhi agar rang-e-hina mere baad

un ka diwana to kahlana hai mushkil 'basit'

koi diwana agar ban bhi gaya mere baad