koi munh chum lega is nahin par

koī muñh chuum legā is nahīñ par

shikan rah jā.egī yūñhī jabīñ par

girī thī aaj to bijlī hamīñ par

ye kahiye jhuk paḌe vo ham-nashīñ par

lahu bekas kā maqtal kī zamīñ par

na dāman par na un kī āstīñ par

balā.eñ ban ke vo aa.iiñ hamīñ par

du'ā.eñ jo ga.iiñ 'arsh-e-barīñ par

ye qismat daaġh jis meñ dard jis meñ

vo dil ho luuT dast-e-nāznīñ par

rulā kar mujh ko poñchhe ashk-e-dushman

rahā dhabbā ye un kī āstīñ par

uḌaa.e phirtī hai un ko javānī

qadam paḌtā nahīñ un kā zamīñ par

are o charḳh dene ke liye daaġh

bahut haiñ chāñd ke TukḌe zamīñ par

nazākat kostī hai mujh ko kyā kyā

tabī'at aa.ī achchhī nāznīñ par

tamannā-e-asar uu chashm-e-hasrat

uThā rakh ab nigāh-e-vāpsīñ par

dharī rah jā.egī yūñhī shab-e-vasl

nahīñ lab par shikan un kī jabīñ par

ḳhudā jaane dikhā.egī ye kyā rang

du'ā.eñ jam' haiñ 'arsh-e-barīñ par

nigāh-e-shauq garm itnī ki bijlī

na aañch aa.e kahīñ us nāznīñ par

mujhe hai ḳhuun kā dā'vā mujhe hai

unhīñ par dāvar-e-mahshar unhīñ par

'riyāz' achchhe musalmāñ aap bhī haiñ

ki dil aayā bhī to kāfir hasīñ par

koi munh chum lega is nahin par

shikan rah jaegi yunhi jabin par

giri thi aaj to bijli hamin par

ye kahiye jhuk paDe wo ham-nashin par

lahu bekas ka maqtal ki zamin par

na daman par na un ki aastin par

balaen ban ke wo aain hamin par

du'aen jo gain 'arsh-e-barin par

ye qismat dagh jis mein dard jis mein

wo dil ho luT dast-e-naznin par

rula kar mujh ko ponchhe ashk-e-dushman

raha dhabba ye un ki aastin par

uDae phirti hai un ko jawani

qadam paDta nahin un ka zamin par

are o charKH dene ke liye dagh

bahut hain chand ke TukDe zamin par

nazakat kosti hai mujh ko kya kya

tabi'at aai achchhi naznin par

tamanna-e-asar u chashm-e-hasrat

uTha rakh ab nigah-e-wapsin par

dhari rah jaegi yunhi shab-e-wasl

nahin lab par shikan un ki jabin par

KHuda jaane dikhaegi ye kya rang

du'aen jam' hain 'arsh-e-barin par

nigah-e-shauq garm itni ki bijli

na aanch aae kahin us naznin par

mujhe hai KHun ka da'wa mujhe hai

unhin par dawar-e-mahshar unhin par

'riyaz' achchhe musalman aap bhi hain

ki dil aaya bhi to kafir hasin par