koi nahin hai dekhne wala to kya hua

koī nahīñ hai dekhne vaalā to kyā huā

terī taraf nahīñ hai ujālā to kyā huā

chāroñ taraf havāoñ meñ us kī mahak to hai

murjhā rahī hai saañs kī maalā to kyā huā

badle meñ tujh ko de to ga.e bhuuk aur pyaas

muñh se jo tere chhīnā nivāla to kyā huā

āñkhoñ se pī rahā huuñ tire pyaar kī sharāb

gar chhuT gayā hai haath se pyālā to kyā huā

dhartī ko merī zaat se kuchh to namī milī

phūTā hai mere paañv kā chhālā to kyā huā

saare jahāñ ne mujh pe lagā.ī haiñ tohmateñ

tum ne bhī merā naam uchhālā to kyā huā

sar par hai maañ ke pyaar kā āñchal paḌā huā

mujh par nahīñ hai koī dushāla to kyā huā

manchoñ pe chuTkule haiñ latīfe haiñ āj-kal

manchoñ pe ne haiñ pant nirālā to kyā huā

ai zindagī tū paas meñ baiThī huī to hai

shīshe meñ tujh ko gar nahīñ Dhālā to kyā huā

āñkhoñ ke ghar meñ aa.ī nahīñ raushnī 'kuñvar'

TuuTā hai phir se niiñd kā taalā to kyā huā

koi nahin hai dekhne wala to kya hua

teri taraf nahin hai ujala to kya hua

chaaron taraf hawaon mein us ki mahak to hai

murjha rahi hai sans ki mala to kya hua

badle mein tujh ko de to gae bhuk aur pyas

munh se jo tere chhina niwala to kya hua

aankhon se pi raha hun tere pyar ki sharab

gar chhuT gaya hai hath se pyala to kya hua

dharti ko meri zat se kuchh to nami mili

phuTa hai mere panw ka chhaala to kya hua

sare jahan ne mujh pe lagai hain tohmaten

tum ne bhi mera nam uchhaala to kya hua

sar par hai man ke pyar ka aanchal paDa hua

mujh par nahin hai koi dushaala to kya hua

manchon pe chuTkule hain latife hain aaj-kal

manchon pe ne hain pant nirala to kya hua

ai zindagi tu pas mein baiThi hui to hai

shishe mein tujh ko gar nahin Dhaala to kya hua

aankhon ke ghar mein aai nahin raushni 'kunwar'

TuTa hai phir se nind ka tala to kya hua