koi nishani-e-ahd-e-visal de jae

koī nishānī-e-ahd-e-visāl de jaa.e

vo merī umr mire māh-o-sāl de jaa.e

use kaho ki kisī roz aa ke phir mujh ko

hasīn ḳhvāb achhūte ḳhayāl de jaa.e

palaT ke aa.e kabhī us kī yaad kā mausam

gul-e-murād ko rañg-e-jamāl de jaa.e

ḳhudā kare ki achānak vo sāmne aa kar

mire laboñ ko na.e kuchh savāl de jaa.e

tamām umr kī ḳhushiyāñ sameT kar merī

tamām umr ke apne malāl de jaa.e

koī to ho jo mire chāra-gar se jā ke kahe

davā kabhī to mire hasb-e-hāl de jaa.e

agar nahīñ hai mudāvā zavāl kā 'shāhid'

vo hausla to ba-vaqt-e-zavāl de jaa.e

koi nishani-e-ahd-e-visal de jae

wo meri umr mere mah-o-sal de jae

use kaho ki kisi roz aa ke phir mujh ko

hasin KHwab achhute KHayal de jae

palaT ke aae kabhi us ki yaad ka mausam

gul-e-murad ko rang-e-jamal de jae

KHuda kare ki achanak wo samne aa kar

mere labon ko nae kuchh sawal de jae

tamam umr ki KHushiyan sameT kar meri

tamam umr ke apne malal de jae

koi to ho jo mere chaara-gar se ja ke kahe

dawa kabhi to mere hasb-e-haal de jae

agar nahin hai mudawa zawal ka 'shahid'

wo hausla to ba-waqt-e-zawal de jae