koi paikar zarur ubhrega

koī paikar zarūr ubhregā

zarb-e-tesha agar lagā.ūñ maiñ

pāra-e-barq shahparoñ meñ hai

hadd-e-imkāñ se paar jā.ūñ maiñ

mirā ham-zād so gayā thak kar

kaise us ko bhalā jagā.ūñ maiñ

nahīñ manzūr ye anā ko mirī

dil-e-bismil use dikhā.ūñ maiñ

jo dikhā.e mujhe mirī sūrat

aa.ina vo kahāñ se lā.ūñ maiñ

ism-e-āzam kā luuñ sahārā aur

ātish-e-yam meñ kuud jā.ūñ maiñ

zad meñ ā.ūñgā ḳhud hī maiñ 'sāhil'

teġh apnī agar uThā.ūñ maiñ

koi paikar zarur ubhrega

zarb-e-tesha agar lagaun main

para-e-barq shahparon mein hai

hadd-e-imkan se par jaun main

mera ham-zad so gaya thak kar

kaise us ko bhala jagaun main

nahin manzur ye ana ko meri

dil-e-bismil use dikhaun main

jo dikhae mujhe meri surat

aaina wo kahan se laun main

ism-e-azam ka lun sahaara aur

aatish-e-yam mein kud jaun main

zad mein aaunga KHud hi main 'sahil'

tegh apni agar uThaun main