koi phul dhup ki pattiyon mein hare ribbon se bandha hua

koī phuul dhuup kī pattiyoñ meñ hare ribbon se bañdhā huā

vo ġhazal kā lahja nayā nayā na kahā huā na sunā huā

jise le ga.ī hai abhī havā vo varaq thā dil kī kitāb kā

kahīñ āñsuoñ se miTā huā kahīñ āñsuoñ se likhā huā

ka.ī miil ret ko kaaT kar koī mauj phuul khilā ga.ī

koī peḌ pyaas se mar rahā hai nadī ke paas khaḌā huā

vahī ḳhat ki jis pe jagah jagah do mahakte hoñToñ ke chāñd the

kisī bhūle-bisre se taaq par tah-e-gard hogā dabā huā

mujhe hādsoñ ne sajā sajā ke bahut hasīn banā diyā

mirā dil bhī jaise dulhan kā haath ho mehñdiyoñ se rachā huā

vahī shahr hai vahī rāste vahī ghar hai aur vahī lawn bhī

magar is darīche se pūchhnā vo daraḳht anaar kā kyā huā

mire saath jugnū hai ham-safar magar is sharar kī bisāt kyā

ye charāġh koī charāġh hai na jalā huā na bujhā huā

koi phul dhup ki pattiyon mein hare ribbon se bandha hua

wo ghazal ka lahja naya naya na kaha hua na suna hua

jise le gai hai abhi hawa wo waraq tha dil ki kitab ka

kahin aansuon se miTa hua kahin aansuon se likha hua

kai mil ret ko kaT kar koi mauj phul khila gai

koi peD pyas se mar raha hai nadi ke pas khaDa hua

wahi KHat ki jis pe jagah jagah do mahakte honTon ke chand the

kisi bhule-bisre se taq par tah-e-gard hoga daba hua

mujhe hadson ne saja saja ke bahut hasin bana diya

mera dil bhi jaise dulhan ka hath ho mehndiyon se racha hua

wahi shahr hai wahi raste wahi ghar hai aur wahi lawn bhi

magar is dariche se puchhna wo daraKHt anar ka kya hua

mere sath jugnu hai ham-safar magar is sharar ki bisat kya

ye charagh koi charagh hai na jala hua na bujha hua