koi sachche KHwab dikhata hai par jaane kaun dikhata hai

koī sachche ḳhvāb dikhātā hai par jaane kaun dikhātā hai

mujhe saarī raat jagātā hai par jaane kaun jagātā hai

koī dariyā hai jis kī lahreñ mujhe khīñch rahī haiñ aur koī

mirī jānib haath baḌhātā hai par jaane kaun baḌhātā hai

kabhī jā-e-namāz kī bāñhoñ meñ kabhī hamd durūd kī chhāñv meñ

koī zār-o-zār rulātā hai par jaane kaun rulātā hai

vahī be-ḳhabarī vahī jīvan kā be-ant safar aur aise meñ

koī apnī yaad dilātā hai par jaane kaun dilātā hai

kahīñ is mālūm sī duniyā meñ koī nā-mālūm sī duniyā hai

koī us ke bhed batātā hai par jaane kaun batātā hai

mirī tanhā.ī meñ ek na.ī tanhā.ī hai jis ke rañgoñ meñ

koī apne rañg milātā hai par jaane kaun milātā hai

koī kahtā hai ye rasta hai aur tere liye hai ye rasta

koī is meñ ḳhaak uḌātā hai par jaane kaun uḌātā hai

koī kahtā hai ye duniyā hai aur tere liye hai ye duniyā

koī is se ḳhauf dilātā hai par jaane kaun dilātā hai

koī kahtā hai is miTTī meñ ka.ī ḳhvāb haiñ aur in ḳhvāboñ se

koī baiThā naqsh banātā hai par jaane kaun banātā hai

koī har shai ke siine meñ kahīñ maujūd hai zāhir hone ko

koī apnā aap chhupātā hai par jaane kaun chhupātā hai

koī dekhā an-dekhā har pal chup-chāp likhe jaatā hai magar

koī mujh meñ shor machātā hai par jaane kaun machātā hai

mujhe duniyā apnī chhab dikhlāne roz chalī aatī hai magar

koī donoñ biich aa jaatā hai par jaane kaun aa jaatā hai

koi sachche KHwab dikhata hai par jaane kaun dikhata hai

mujhe sari raat jagata hai par jaane kaun jagata hai

koi dariya hai jis ki lahren mujhe khinch rahi hain aur koi

meri jaanib hath baDhata hai par jaane kaun baDhata hai

kabhi ja-e-namaz ki banhon mein kabhi hamd durud ki chhanw mein

koi zar-o-zar rulata hai par jaane kaun rulata hai

wahi be-KHabari wahi jiwan ka be-ant safar aur aise mein

koi apni yaad dilata hai par jaane kaun dilata hai

kahin is malum si duniya mein koi na-malum si duniya hai

koi us ke bhed batata hai par jaane kaun batata hai

meri tanhai mein ek nai tanhai hai jis ke rangon mein

koi apne rang milata hai par jaane kaun milata hai

koi kahta hai ye rasta hai aur tere liye hai ye rasta

koi is mein KHak uData hai par jaane kaun uData hai

koi kahta hai ye duniya hai aur tere liye hai ye duniya

koi is se KHauf dilata hai par jaane kaun dilata hai

koi kahta hai is miTTi mein kai KHwab hain aur in KHwabon se

koi baiTha naqsh banata hai par jaane kaun banata hai

koi har shai ke sine mein kahin maujud hai zahir hone ko

koi apna aap chhupata hai par jaane kaun chhupata hai

koi dekha an-dekha har pal chup-chap likhe jata hai magar

koi mujh mein shor machata hai par jaane kaun machata hai

mujhe duniya apni chhab dikhlane roz chali aati hai magar

koi donon bich aa jata hai par jaane kaun aa jata hai