koi sang-e-rah bhi chamak uTha to sitara-e-sahari kaha

koī sañg-e-rah bhī chamak uThā to sitāra-e-saharī kahā

mirī raat bhī tire naam thī use kis ne tīra-shabī kahā

mire roz o shab bhī ajiib the na shumār thā na hisāb thā

kabhī umr bhar kī ḳhabar na thī kabhī ek pal ko sadī kahā

mujhe jāntā bhī koī na thā mire be-niyāz tire sivā

na shikast-e-dil na shikast-e-jāñ ki tirī ḳhushī ko ḳhushī kahā

koī yaad aa bhī ga.ī to kyā koī zaḳhm khil bhī uThā to kyā

jo sabā qarīb se ho chalī use minnatoñ kī ghaḌī kahā

bharī dopahar meñ jo paas thī vo tire ḳhayāl kī chhāñv thī

kabhī shāḳh-e-gul se misāl dī kabhī us ko sarv-e-sahī kahā

kahīñ sañg-e-rah kahīñ sang-e-dar ki maiñ pattharoñ ke nagar meñ huuñ

ye nahīñ ki dil ko ḳhabar na thī ye batā ki muñh se kabhī kahā

mire harf harf ke haath meñ sabhī ā.inoñ kī haiñ kirchiyāñ

jo zabāñ se ho na sakā 'adā' ba-hudūd-e-be-suḳhanī kahā

koi sang-e-rah bhi chamak uTha to sitara-e-sahari kaha

meri raat bhi tere nam thi use kis ne tira-shabi kaha

mere roz o shab bhi ajib the na shumar tha na hisab tha

kabhi umr bhar ki KHabar na thi kabhi ek pal ko sadi kaha

mujhe jaanta bhi koi na tha mere be-niyaz tere siwa

na shikast-e-dil na shikast-e-jaan ki teri KHushi ko KHushi kaha

koi yaad aa bhi gai to kya koi zaKHm khil bhi uTha to kya

jo saba qarib se ho chali use minnaton ki ghaDi kaha

bhari dopahar mein jo pas thi wo tere KHayal ki chhanw thi

kabhi shaKH-e-gul se misal di kabhi us ko sarw-e-sahi kaha

kahin sang-e-rah kahin sang-e-dar ki main pattharon ke nagar mein hun

ye nahin ki dil ko KHabar na thi ye bata ki munh se kabhi kaha

mere harf harf ke hath mein sabhi aainon ki hain kirchiyan

jo zaban se ho na saka 'ada' ba-hudud-e-be-suKHani kaha