koi saughat-e-wafa de ke chala jaunga

koī sauġhāt-e-vafā de ke chalā jā.ūñgā

tujh ko jiine kī adā de ke chalā jā.ūñgā

mere dāman meñ agar kuchh na rahegā baaqī

aglī nasloñ ko duā de ke chalā jā.ūñgā

terī rāhoñ meñ mire baad na jaane kyā ho

maiñ to naqsh-e-kaf-e-pā de ke chalā jā.ūñgā

merī āvāz ko tarsegā tirā rañg-mahal

maiñ to ik baar sadā de ke chalā jā.ūñgā

merā māhaul rulātā hai mujhe aaj magar

tum ko hañsne kī fazā de ke chalā jā.ūñgā

bā.is-e-amn-o-mohabbat hai agar merā lahū

qatra qatra ba-ḳhudā de ke chalā jā.ūñgā

umr bhar buḳhl kā ehsās rulā.egā tumheñ

maiñ to saa.il huuñ duā de ke chalā jā.ūñgā

mere ajdād ne sauñpī thī jo mujh ko 'razmī'

nasl-e-nau ko vo qabā de ke chalā jā.ūñgā

koi saughat-e-wafa de ke chala jaunga

tujh ko jine ki ada de ke chala jaunga

mere daman mein agar kuchh na rahega baqi

agli naslon ko dua de ke chala jaunga

teri rahon mein mere baad na jaane kya ho

main to naqsh-e-kaf-e-pa de ke chala jaunga

meri aawaz ko tarsega tera rang-mahal

main to ek bar sada de ke chala jaunga

mera mahaul rulata hai mujhe aaj magar

tum ko hansne ki faza de ke chala jaunga

bais-e-amn-o-mohabbat hai agar mera lahu

qatra qatra ba-KHuda de ke chala jaunga

umr bhar buKHl ka ehsas rulaega tumhein

main to sail hun dua de ke chala jaunga

mere ajdad ne saunpi thi jo mujh ko 'razmi'

nasl-e-nau ko wo qaba de ke chala jaunga