koi shadab-o-hasin shahr ka manzar dekho

koī shādāb-o-hasīñ shahr kā manzar dekho

jhāñk kar rauzan-e-ehsās se bāhar dekho

merī āvāz mirā jism mirā chehra hai

ho jo mumkin to mujhe haath lagā kar dekho

umr bhar apnā ta.āqub kiyā ham ne dar-dar

aur us aks kā isrār thā paikar dekho

ek saa.e kī tarah saath hai bachchoñ kā hujūm

dil hai shīsha to har ik haath meñ patthar dekho

ek tasvīr lakīroñ meñ chhupī baiThī hai

jism kahtā hai use haath lagā kar dekho

ek ḳhushbū kī tarah ruuh se lipTe na raho

kabhī mujh ko bhī zarā duur hī rah kar dekho

shā.irī Thahrī hai is daur meñ la.anat 'parvāz'

biivī bachche kabhī ghar aur kabhī daftar dekho

koi shadab-o-hasin shahr ka manzar dekho

jhank kar rauzan-e-ehsas se bahar dekho

meri aawaz mera jism mera chehra hai

ho jo mumkin to mujhe hath laga kar dekho

umr bhar apna taaqub kiya hum ne dar-dar

aur us aks ka israr tha paikar dekho

ek sae ki tarah sath hai bachchon ka hujum

dil hai shisha to har ek hath mein patthar dekho

ek taswir lakiron mein chhupi baiThi hai

jism kahta hai use hath laga kar dekho

ek KHushbu ki tarah ruh se lipTe na raho

kabhi mujh ko bhi zara dur hi rah kar dekho

shairi Thahri hai is daur mein lanat 'parwaz'

biwi bachche kabhi ghar aur kabhi daftar dekho