koi shai nahin yahan mustaqil ye ajab yahan ka nizam hai

koī shai nahīñ yahāñ mustaqil ye ajab yahāñ kā nizām hai

kabhī dhuup hai kabhī chhāñv hai kabhī sub.h hai kabhī shaam hai

vo jafā kareñ to jafā kareñ maiñ vafā se baaz na ā.ūñgā

unheñ apne kaam se kaam hai mujhe apne kaam se kaam hai

jo hamārī nazreñ na pā sakeñ to hamārī nazroñ kī hai ḳhatā

tirā jalva pahle bhī aam thā tirā jalva aaj bhī aam hai

ye miTā chukī mirī zindagī to karam se apne sañvār de

vo mirī nigāh kā kaam thā ye tirī nigāh kā kaam hai

vo haram ho yā ki ho but-kada ki vo sañg-e-dar ho habīb kā

jahāñ terī yaad na aa sake vahāñ sajda karnā harām hai

ye ḳhabar hai ziist kā kārvāñ rah-e-ishq meñ hai ravāñ-davāñ

magar us kī koī ḳhabar nahīñ ki safar kahāñ pe tamām hai

use zindagī kā laqab diyā ki jo ek ḳhvāb-e-fareb hai

use maut kahtā hai be-ḳhabar ki jo zindagī kā payām hai

nahīñ kāmyāb amal agar tū adam meñ ho ki vajūd meñ

na yahī sukūñ kā maqām hai na vahī sukūñ kā maqām hai

koi shai nahin yahan mustaqil ye ajab yahan ka nizam hai

kabhi dhup hai kabhi chhanw hai kabhi subh hai kabhi sham hai

wo jafa karen to jafa karen main wafa se baz na aaunga

unhen apne kaam se kaam hai mujhe apne kaam se kaam hai

jo hamari nazren na pa saken to hamari nazron ki hai KHata

tera jalwa pahle bhi aam tha tera jalwa aaj bhi aam hai

ye miTa chuki meri zindagi to karam se apne sanwar de

wo meri nigah ka kaam tha ye teri nigah ka kaam hai

wo haram ho ya ki ho but-kada ki wo sang-e-dar ho habib ka

jahan teri yaad na aa sake wahan sajda karna haram hai

ye KHabar hai zist ka karwan rah-e-ishq mein hai rawan-dawan

magar us ki koi KHabar nahin ki safar kahan pe tamam hai

use zindagi ka laqab diya ki jo ek KHwab-e-fareb hai

use maut kahta hai be-KHabar ki jo zindagi ka payam hai

nahin kaamyab amal agar tu adam mein ho ki wajud mein

na yahi sukun ka maqam hai na wahi sukun ka maqam hai