koi siwa-e-badan hai na hai wara-e-badan

koī sivā-e-badan hai na hai varā-e-badan

badan meñ guuñj rahī hai abhī sadā-e-badan

ajab hai shahr magar shahr se bhī log ajab

udhār maañg rahe haiñ badan barā-e-badan

jahāñ ThiThurtī tamannā ko aag tak na mile

vahāñ pe kaun Thahartā hai ai sarā-e-badan

kahīñ chamaktī huī ret bhī dikhā.ī na dī

kahāñ gayā vo samundar sarāb khaa.e badan

charāġh ban ke chamakte haiñ roz shaam Dhale

hamāre pahlū meñ so.e hue parā.e badan

har ek raah meñ bikhre paḌe haiñ barg-e-nafas

yahāñ chalī hai bahut din talak havā-e-badan

vo apnī qaus-e-quzah le gayā to kyā hogā

'tarīr' ġhaur-talab hai tirī fazā-e-badan

koi siwa-e-badan hai na hai wara-e-badan

badan mein gunj rahi hai abhi sada-e-badan

ajab hai shahr magar shahr se bhi log ajab

udhaar mang rahe hain badan bara-e-badan

jahan ThiThurti tamanna ko aag tak na mile

wahan pe kaun Thaharta hai ai sara-e-badan

kahin chamakti hui ret bhi dikhai na di

kahan gaya wo samundar sarab khae badan

charagh ban ke chamakte hain roz sham Dhale

hamare pahlu mein soe hue parae badan

har ek rah mein bikhre paDe hain barg-e-nafas

yahan chali hai bahut din talak hawa-e-badan

wo apni qaus-e-quzah le gaya to kya hoga

'tarir' ghaur-talab hai teri faza-e-badan