koi tamir ki surat nikalo

koī ta.amīr kī sūrat nikālo

koī taaza binā-e-ishq Daalo

bulātī haiñ tumheñ yādeñ purānī

charāġh-e-raftagāñ fursat nikālo

mujhe chehroñ se ḳhauf aane lagā hai

mire kamre se tasvīreñ haTā lo

ye dariyā hai guzar jaanā hai is ko

musāfir ho tum apnā rāsta lo

kahāñ ab vo libās-e-vaz.a-dārī

bahut jaano agar ġhurbat chhupā lo

vafā qīmat nahīñ jo lauT aa.e

tum apnā az-sar-e-nau jā.eza lo

nahīñ āzār-e-jāñ koī to mirzā

kisī dīvār kā saaya uThā lo

koi tamir ki surat nikalo

koi taza bina-e-ishq Dalo

bulati hain tumhein yaaden purani

charagh-e-raftagan fursat nikalo

mujhe chehron se KHauf aane laga hai

mere kamre se taswiren haTa lo

ye dariya hai guzar jaana hai is ko

musafir ho tum apna rasta lo

kahan ab wo libas-e-waza-dari

bahut jaano agar ghurbat chhupa lo

wafa qimat nahin jo lauT aae

tum apna az-sar-e-nau jaeza lo

nahin aazar-e-jaan koi to mirza

kisi diwar ka saya uTha lo