koi taswir yahan aaina-KHanon mein nahin

koī tasvīr yahāñ ā.ina-ḳhānoñ meñ nahīñ

ab hadaf kaun ho jab tiir kamānoñ meñ nahīñ

be-hisī jabr-e-musalsal kā natīja Thahrī

harf maslūb hue nutq zabānoñ meñ nahīñ

log kuchh itne haqīqat ke parastār hue

ya.anī vo shaḳhs nayā hai jo purānoñ meñ nahīñ

ham ki maazī bhī haiñ imroz bhī haiñ fardā bhī

ham sabhī kuchh haiñ magar qaid zamānoñ meñ nahīñ

shāḳh-dar-shāḳh tarāshī ga.iiñ rāheñ kitnī

par kushāda to hue rabt uḌānoñ meñ nahīñ

aisā āshob to pahle kabhī dekhā na sunā

bhiiḌ galiyoñ meñ hai log apne makānoñ meñ nahīñ

vo mohabbat hī mohabbat hai ye irfāñ bhī huā

us kā maskan to diloñ meñ hai chaTānoñ meñ nahīñ

koi taswir yahan aaina-KHanon mein nahin

ab hadaf kaun ho jab tir kamanon mein nahin

be-hisi jabr-e-musalsal ka natija Thahri

harf maslub hue nutq zabanon mein nahin

log kuchh itne haqiqat ke parastar hue

yani wo shaKHs naya hai jo puranon mein nahin

hum ki mazi bhi hain imroz bhi hain farda bhi

hum sabhi kuchh hain magar qaid zamanon mein nahin

shaKH-dar-shaKH tarashi gain rahen kitni

par kushada to hue rabt uDanon mein nahin

aisa aashob to pahle kabhi dekha na suna

bhiD galiyon mein hai log apne makanon mein nahin

wo mohabbat hi mohabbat hai ye irfan bhi hua

us ka maskan to dilon mein hai chaTanon mein nahin