koi to aa ke mere dar ko khaTkhaTae bhi

koī to aa ke mire dar ko khaTkhaTā.e bhī

añdherī raat meñ jugnū sā jagmagā.e bhī

gumāñ ke pinjre meñ kab se koī parinda hai

kabhī to khole paroñ ko ki phaḌphaḌā.e bhī

anā kī dhuup meñ gum-sum khaḌā hai kaun yahāñ

maiñ chhāñv huuñ mujhe dekhe vo muskurā.e bhī

vo merī saañs kā jaise aTuuT hissa hai

agar hai us ko bhī ehsās to jatā.e bhī

dhuāñ dhuāñ sā jo manzar dikhā.ī detā hai

kabhī to dil meñ vo chehra sā jhilmilā.e bhī

maiñ aa.ina to nahīñ huuñ qubūl hai lekin

kamī hai kyā mire andar koī batā.e bhī

tamām umr hī hañstā rahā huuñ maiñ 'ādil'

kabhī to nam hoñ ye āñkheñ koī rulā.e bhī

koi to aa ke mere dar ko khaTkhaTae bhi

andheri raat mein jugnu sa jagmagae bhi

guman ke pinjre mein kab se koi parinda hai

kabhi to khole paron ko ki phaDphaDae bhi

ana ki dhup mein gum-sum khaDa hai kaun yahan

main chhanw hun mujhe dekhe wo muskurae bhi

wo meri sans ka jaise aTuT hissa hai

agar hai us ko bhi ehsas to jatae bhi

dhuan dhuan sa jo manzar dikhai deta hai

kabhi to dil mein wo chehra sa jhilmilae bhi

main aaina to nahin hun qubul hai lekin

kami hai kya mere andar koi batae bhi

tamam umr hi hansta raha hun main 'adil'

kabhi to nam hon ye aankhen koi rulae bhi