koi TuTi hui kashti ka taKHta bhi agar hai la

koī TuuTī huī kashtī kā taḳhta bhī agar hai lā

abhī sāhil pe hai to aur pesh-az-marg vāvailā

añdherī raat se Dartā hai mīr-e-kārvāñ ho ke

añdherā hai to apne dāġh-e-dil kī raushnī phailā

na ghabrā tīrgī se tū qasam hai sañg-e-asvad kī

ki tārīkī hī meñ soī hai shām-e-gesū-e-lailā

mazāq-e-shādī-o-ġham tā-kujā ai ḳhaak ke putle

jo in donoñ se bālā-tar hoñ aisī bhī koī shai lā

sharāb-e-asr-e-nau meñ be-ḳhudī hai nai ḳhudī saaqī

jo tū ne aaj se pahle pilā.ī thī vahī mai lā

man andāz-e-qadat-rā mī shanāsam mard-e-afrañgī

ki kapḌe saaf haiñ lekin badan nāpāk dil mailā

kisī kā nāz-e-husn aur ai 'shafīq' apnā ye kah denā

ki qīmat meñ agar dil ke barābar ho koī shai lā

koi TuTi hui kashti ka taKHta bhi agar hai la

abhi sahil pe hai to aur pesh-az-marg wawaila

andheri raat se Darta hai mir-e-karwan ho ke

andhera hai to apne dagh-e-dil ki raushni phaila

na ghabra tirgi se tu qasam hai sang-e-aswad ki

ki tariki hi mein soi hai sham-e-gesu-e-laila

mazaq-e-shadi-o-gham ta-kuja ai KHak ke putle

jo in donon se baala-tar hon aisi bhi koi shai la

sharab-e-asr-e-nau mein be-KHudi hai nai KHudi saqi

jo tu ne aaj se pahle pilai thi wahi mai la

man andaz-e-qadat-ra mi shanasam mard-e-afrangi

ki kapDe saf hain lekin badan napak dil maila

kisi ka naz-e-husn aur ai 'shafiq' apna ye kah dena

ki qimat mein agar dil ke barabar ho koi shai la