koi us sitamgar ko aagah kar de ki baz aae aazar dene se jhaT-paT

koī us sitamgar ko āgāh kar de ki baaz aa.e āzār dene se jhaT-paT

udhar kī idhar aaj hotī hai duniyā marīz-e-mohabbat badaltā hai karvaT

kabhī parda-dārī kabhī ḳhud-numā.ī kabhī kuchh rukāvaT kabhī kuchh lagāvaT

tumhārī ye chāroñ adā.eñ ġhazab haiñ ye chāroñ kareñgī hazāroñ ko chaupaT

qayāmat na uTThe ki uTThe jahāñ meñ magar bil-yaqīñ maiñ to uTThūñgā jhaT-paT

tah-e-qabr jis vaqt mujh ko milegī sar-e-qabr kuchh un ke qadmoñ kī aahaT

koī kis tarah is ko taslīm kar le ki donoñ akele basar kar rahe haiñ

tire gird terī adāoñ kā majma' mirī hasratoñ kā mire paas jamghaT

ḳhudā jaane aapas meñ kyā pesh aa.e ye tāḳhīr-o-tājīl kyā rang laa.e

hamārā irāda ki fauran na deñ dil tumhārī tamannā ki mil jaa.e jhaT-paT

kahāñ lutf-e-bazm-e-masarrat uThāyā kahāñ daur-e-pur-kaif guzre nazar se

mai-e-nāb auroñ ke hisse meñ aa.ī hamāre muqaddar meñ thī sirf talchhaT

udhar vo bhī sargarm-e-zulm-o-jafā hai idhar ham bhī masrūf-e-āh-o-bukā haiñ

kahīñ baḌhte baḌhte na baḌh jaa.e jhagḌā kahīñ hote hote na ho jaa.e khaTpaT

ye kyuuñ hai ta.ammul ye kyuuñ hai tavaqquf ye inkār kyā hai ye aġhmāz kyā hai

laḌāo bhī āñkheñ milāo bhī nazreñ dikhāo bhī mukhḌā uThāo bhī ghūñghaT

bahut kuchh chhupāyā bahut kuchh bachāyā magar pesh-bandī na kuchh kaam aa.ī

kiye ḳhanjar-e-nāz ne chaar TukḌe bil-āḳhir huā dil mohabbat meñ chaupaT

mohabbat meñ ye jhiḌkiyāñ bhī 'abas haiñ ye har vaqt kī dhamkiyāñ bhī 'abas haiñ

karam ho ki mujh par sitam ho tumhārā na uTThūñgā dar se na chhoḌūñgā chaukhaT

bayān-e-tamannā sunā aur sun kar baḌī der se ġhaur farmā rahe haiñ

na ā.eñge yā mere ghar aa ga.e vo jo honā ho irshād ho jaa.e jhaT-paT

sitam bhī uThā.e hazāroñ tarah ke balā.eñ bhī jhelīñ hazāroñ tarah kī

huā tajraba ham ko ye dil lagā kar hasīnoñ se dil kā lagānā hai jhanjhaT

tire 'ishq meñ kyuuñ na maiñ dil ko ro.uuñ jigar ke liye kyuuñ na maiñ aah khīñchūñ

shab-o-roz kī muḳhtalif āfatoñ ne ise kar diyā chit use kar diyā paT

banā ġhairat-e-ā.īna dil hamārā ġhubār aa.e kyuuñ kar kudūrat rahe kyā

masal hai vo ḳhas-kam jahāñ paak vaalī na is ghar meñ kuuḌā na us ghar meñ karkaT

mohabbat ke raste meñ ai shauq-e-manzil milegā 'ajab lutf pā-e-talab ko

udhar ḳhaar haiñ aur idhar aable haiñ agar nazr haañ vo haiñ to ye haiñ muñh-phaT

tire 'ishq meñ chain se kyā rahūñ maiñ tire 'ishq meñ jab na de chain mujh ko

nazar kā palaTnā zabāñ kā badalnā muqaddar kī gardish zamāne kī karvaT

ye ai 'nūh' kis ne tumheñ raa.e dī thī ki tūfāñ uThāo zamīñ-dār ho kar

ab achchhā tamāshā nazar aa rahā hai tah-e-āb khātā sar-e-āb khevaT

koi us sitamgar ko aagah kar de ki baz aae aazar dene se jhaT-paT

udhar ki idhar aaj hoti hai duniya mariz-e-mohabbat badalta hai karwaT

kabhi parda-dari kabhi KHud-numai kabhi kuchh rukawaT kabhi kuchh lagawaT

tumhaari ye chaaron adaen ghazab hain ye chaaron karengi hazaron ko chaupaT

qayamat na uTThe ki uTThe jahan mein magar bil-yaqin main to uTThunga jhaT-paT

tah-e-qabr jis waqt mujh ko milegi sar-e-qabr kuchh un ke qadmon ki aahaT

koi kis tarah is ko taslim kar le ki donon akele basar kar rahe hain

tere gird teri adaon ka majma' meri hasraton ka mere pas jamghaT

KHuda jaane aapas mein kya pesh aae ye taKHir-o-tajil kya rang lae

hamara irada ki fauran na den dil tumhaari tamanna ki mil jae jhaT-paT

kahan lutf-e-bazm-e-masarrat uThaya kahan daur-e-pur-kaif guzre nazar se

mai-e-nab auron ke hisse mein aai hamare muqaddar mein thi sirf talchhaT

udhar wo bhi sargarm-e-zulm-o-jafa hai idhar hum bhi masruf-e-ah-o-buka hain

kahin baDhte baDhte na baDh jae jhagDa kahin hote hote na ho jae khaTpaT

ye kyun hai tammul ye kyun hai tawaqquf ye inkar kya hai ye aghmaz kya hai

laDao bhi aankhen milao bhi nazren dikhao bhi mukhDa uThao bhi ghunghaT

bahut kuchh chhupaya bahut kuchh bachaya magar pesh-bandi na kuchh kaam aai

kiye KHanjar-e-naz ne chaar TukDe bil-aKHir hua dil mohabbat mein chaupaT

mohabbat mein ye jhiDkiyan bhi 'abas hain ye har waqt ki dhamkiyan bhi 'abas hain

karam ho ki mujh par sitam ho tumhaara na uTThunga dar se na chhoDunga chaukhaT

bayan-e-tamanna suna aur sun kar baDi der se ghaur farma rahe hain

na aaenge ya mere ghar aa gae wo jo hona ho irshad ho jae jhaT-paT

sitam bhi uThae hazaron tarah ke balaen bhi jhelin hazaron tarah ki

hua tajraba hum ko ye dil laga kar hasinon se dil ka lagana hai jhanjhaT

tere 'ishq mein kyun na main dil ko roun jigar ke liye kyun na main aah khinchun

shab-o-roz ki muKHtalif aafaton ne ise kar diya chit use kar diya paT

bana ghairat-e-aina dil hamara ghubar aae kyun kar kudurat rahe kya

masal hai wo KHas-kam jahan pak wali na is ghar mein kuDa na us ghar mein karkaT

mohabbat ke raste mein ai shauq-e-manzil milega 'ajab lutf pa-e-talab ko

udhar KHar hain aur idhar aable hain agar nazr han wo hain to ye hain munh-phaT

tere 'ishq mein chain se kya rahun main tere 'ishq mein jab na de chain mujh ko

nazar ka palaTna zaban ka badalna muqaddar ki gardish zamane ki karwaT

ye ai 'nuh' kis ne tumhein rae di thi ki tufan uThao zamin-dar ho kar

ab achchha tamasha nazar aa raha hai tah-e-ab khata sar-e-ab khewaT