koshish-e-paiham ko sai-e-raegan kahte raho

koshish-e-paiham ko sa.ī-e-rā.egāñ kahte raho

ham chale ab tum hamārī dāstāñ kahte raho

guftanī bāteñ sahī nāguftanī bāteñ sahī

chup na baiTho koī afsāna yahāñ kahte raho

maslahat kyā baat jo haq hī vo kah do barmalā

laakh hoñ ahbāb tum se bad-gumāñ kahte raho

ham ki the āzād āzādī kī ḳhātir mar ga.e

jiine vaalo tum qafas ko āshiyāñ kahte raho

sirf kahne se zamīñ kyā āsmāñ ho jā.egī

kuchh nahīñ hogā zamīñ ko āsmāñ kahte raho

raah kyā manzil hai kaisī har haqīqat hai fareb

kārvāñ ko bhī ġhubār-e-kārvāñ kahte raho

kyuuñ karo 'aḳhtar' kī bāteñ vo to ik dīvāna hai

tum to yaaro apnī apnī dāstāñ kahte raho

koshish-e-paiham ko sai-e-raegan kahte raho

hum chale ab tum hamari dastan kahte raho

guftani baaten sahi naguftani baaten sahi

chup na baiTho koi afsana yahan kahte raho

maslahat kya baat jo haq hi wo kah do barmala

lakh hon ahbab tum se bad-guman kahte raho

hum ki the aazad aazadi ki KHatir mar gae

jine walo tum qafas ko aashiyan kahte raho

sirf kahne se zamin kya aasman ho jaegi

kuchh nahin hoga zamin ko aasman kahte raho

rah kya manzil hai kaisi har haqiqat hai fareb

karwan ko bhi ghubar-e-karwan kahte raho

kyun karo 'aKHtar' ki baaten wo to ek diwana hai

tum to yaro apni apni dastan kahte raho