koshish hai gar uski ki pareshan karega

koshish hai gar us kī ki pareshān karegā

vo dushman-e-jāñ dard ko āsān karegā

ham us ko javāboñ se pashemān kareñge

vo ham ko savāloñ se pashemān karegā

pahlū-tahī karte hue duzdīda jo dekhe

chehre ke ta.assur se vo hairān karegā

tū chhup ke hī aa.e ki bar-afganda-naqāb aa.e

dil kī yahī aadat hai ki nuqsān karegā

qazzāqoñ kī bastī meñ rahā karte haiñ ham sab

har ghar ko koī dūsrā vīrān karegā

har Tiis se ubhregī tirī yaad kī ḳhushbū

har zaḳhm mire shauq pe ehsān karegā

'aslam' ye sunā hai ki mirā shahr-e-vafā bhī

taḳhrīb ko sharminda-e-īqān karegā

koshish hai gar us ki ki pareshan karega

wo dushman-e-jaan dard ko aasan karega

hum us ko jawabon se pasheman karenge

wo hum ko sawalon se pasheman karega

pahlu-tahi karte hue duzdida jo dekhe

chehre ke tassur se wo hairan karega

tu chhup ke hi aae ki bar-afganda-naqab aae

dil ki yahi aadat hai ki nuqsan karega

qazzaqon ki basti mein raha karte hain hum sab

har ghar ko koi dusra viran karega

har Tis se ubhregi teri yaad ki KHushbu

har zaKHm mere shauq pe ehsan karega

'aslam' ye suna hai ki mera shahr-e-wafa bhi

taKHrib ko sharminda-e-iqan karega