kuchh abruon pe bal bhi hain KHanda-labi ke sath

kuchh abruoñ pe bal bhī haiñ ḳhanda-labī ke saath

farmā rahe haiñ jaur magar dil-kashī ke saath

shāmil ho gar na ġham kī ḳhalish zindagī ke saath

rakkhe na koī rabt-e-mohabbat kisī ke saath

is ehtimām-e-jashn-e-mashiyyat ko kyā kahūñ

paidā kiyā hai dard dil-e-ādmī ke saath

jiine na deñ hayāt kī paiham sharārteñ

insāñ jo ḳhud sharīr na ho zindagī ke saath

har gaam par hai laġhzish-e-pā kā bhī ik ḳhatar

chaliye rah-e-vafā meñ salāmat-ravī ke saath

mumkin hai mil hī jaa.e maqām-e-sukūñ kahīñ

tā marg ham-rikāb raho zindagī ke saath

bā-vasf-e-zikr-e-kausar-o-tasnīm kis liye

vaa.iz ko zid hai mashġhala-e-mai-kashī ke saath

mālūm us kī talḳhi-e-anjām hai magar

'anvar' bilā ḳhulūs na miliye kisī ke saath

kuchh abruon pe bal bhi hain KHanda-labi ke sath

farma rahe hain jaur magar dil-kashi ke sath

shamil ho gar na gham ki KHalish zindagi ke sath

rakkhe na koi rabt-e-mohabbat kisi ke sath

is ehtimam-e-jashn-e-mashiyyat ko kya kahun

paida kiya hai dard dil-e-admi ke sath

jine na den hayat ki paiham shararten

insan jo KHud sharir na ho zindagi ke sath

har gam par hai laghzish-e-pa ka bhi ek KHatar

chaliye rah-e-wafa mein salamat-rawi ke sath

mumkin hai mil hi jae maqam-e-sukun kahin

ta marg ham-rikab raho zindagi ke sath

ba-wasf-e-zikr-e-kausar-o-tasnim kis liye

waiz ko zid hai mashghala-e-mai-kashi ke sath

malum us ki talKHi-e-anjam hai magar

'anwar' bila KHulus na miliye kisi ke sath