kuchh aisa utra main us sang-dil ke shishe mein

kuchh aisā utrā maiñ us sañg-dil ke shīshe meñ

ki chand saañs bhī aa.e na apne hisse meñ

vo ek aise samundar ke ruup meñ aayā

ki umr kaT ga.ī jis ko ubuur karne meñ

mujhe ḳhud apnī talab kā nahīñ hai andāza

ye kā.enāt bhī thoḌī hai mere kaase meñ

milī to hai mirī tanhā.iyoñ ko āzādī

juḌī huī haiñ kuchh āñkheñ magar darīche meñ

ġhanīm bhī koī mujh ko nazar nahīñ aatā

ghirā huā bhī huuñ chāroñ taraf se ḳhatre meñ

mirā shu.ūr bhī shāyad vo tifl-e-kam-sin hai

bichhaḌ gayā hai jo gumrāhiyoñ ke mele meñ

hunar hai shā.irī shatranj shauq hai merā

ye jā.idād 'muzaffar' milī hai virse meñ

kuchh aisa utra main us sang-dil ke shishe mein

ki chand sans bhi aae na apne hisse mein

wo ek aise samundar ke rup mein aaya

ki umr kaT gai jis ko ubur karne mein

mujhe KHud apni talab ka nahin hai andaza

ye kaenat bhi thoDi hai mere kase mein

mili to hai meri tanhaiyon ko aazadi

juDi hui hain kuchh aankhen magar dariche mein

ghanim bhi koi mujh ko nazar nahin aata

ghira hua bhi hun chaaron taraf se KHatre mein

mera shuur bhi shayad wo tifl-e-kam-sin hai

bichhaD gaya hai jo gumrahiyon ke mele mein

hunar hai shairi shatranj shauq hai mera

ye jaidad 'muzaffar' mili hai wirse mein