kuchh aise dard bhi KHu-e-kamal tak aae

kuchh aise dard bhī ḳhū-e-kamāl tak aa.e

asar shaguftagī-e-ḳhāl-ḳhāl tak aa.e

kisī ke haath hī raazī na the rafū ke liye

vagarna zaḳhm had-e-indimāl tak aa.e

hai ab ravānī-e-ġham mauj mauj ik jaisī

ham apnī aañkh se dariyā ke haal tak aa.e

kalī chaTaḳh ke laboñ ke mizāj tak pahuñchī

gulāb Tuut ke surḳhī-e-gāl tak aa.e

maiñ vo shajar huuñ du'ā.eñ bachā ga.iiñ jis ko

kulhāḌe yuuñ to bahut Daal Daal tak aa.e

kuchh aise dard bhi KHu-e-kamal tak aae

asar shaguftagi-e-KHal-KHal tak aae

kisi ke hath hi raazi na the rafu ke liye

wagarna zaKHm had-e-indimal tak aae

hai ab rawani-e-gham mauj mauj ek jaisi

hum apni aankh se dariya ke haal tak aae

kali chaTaKH ke labon ke mizaj tak pahunchi

gulab Tut ke surKHi-e-gal tak aae

main wo shajar hun du'aen bacha gain jis ko

kulhaDe yun to bahut Dal Dal tak aae