kuchh aise ki hai ada rasm-e-bandagi maine

kuchh aise kī hai adā rasm-e-bandagī maiñ ne

guzār dī tire va.ade pe zindagī maiñ ne

uḌā ke dhajjiyāñ dāman kī kartā kyoñ rusvā

junūñ meñ kī na gavāra darindagī maiñ ne

zarā bhī shikva-e-jaur-o-jafā nahīñ lab par

tirī razā ko jo samjhā hai bandagī maiñ ne

aziiz jaan se zyāda mujhe hai ye ġham dost

ki ġham meñ paa.ī hai ik sharh-e-zindagī maiñ ne

huzūr-e-husn huā hai ye vāqi.a aksar

havās-o-hosh kī dekhī parindagī maiñ ne

ziyā-e-mehr-e-hidāyat kī tābisheñ le kar

jalā dī kufr-o-zalālat kī gandagī maiñ ne

misāl-e-lāla-o-sahrā saham saham ke rahā

hujūm-e-ḳhār meñ kaaTī hai zindagī maiñ ne

lagā.eñ kufr ke fatve hazār ahl-e-ḳhirad

kiyā hai pesh-e-sanam ahd-e-bandagī maiñ ne

na milne par bhī use 'aish' pyaar kartā huuñ

yuuñ ūñchā kar diyā me.ār-e-zindagī maiñ ne

kuchh aise ki hai ada rasm-e-bandagi main ne

guzar di tere wade pe zindagi main ne

uDa ke dhajjiyan daman ki karta kyon ruswa

junun mein ki na gawara darindagi main ne

zara bhi shikwa-e-jaur-o-jafa nahin lab par

teri raza ko jo samjha hai bandagi main ne

aziz jaan se zyaada mujhe hai ye gham dost

ki gham mein pai hai ek sharh-e-zindagi main ne

huzur-e-husn hua hai ye waqia aksar

hawas-o-hosh ki dekhi parindagi main ne

ziya-e-mehr-e-hidayat ki tabishen le kar

jala di kufr-o-zalalat ki gandagi main ne

misal-e-lala-o-sahra saham saham ke raha

hujum-e-KHar mein kaTi hai zindagi main ne

lagaen kufr ke fatwe hazar ahl-e-KHirad

kiya hai pesh-e-sanam ahd-e-bandagi main ne

na milne par bhi use 'aish' pyar karta hun

yun uncha kar diya mear-e-zindagi main ne