kuchh apne kaam nahin aawe jam-e-jam ki kitab

kuchh apne kaam nahīñ aave jām-e-jam kī kitāb

kifāyat apne ko bas ek apne ġham kī kitāb

nahīñ ḳhayāl sivā us ke aur hai dil meñ

jo maktab ishq meñ jaise paḌhā sanam kī kitāb

ḳhat aane se nahīñ ḳhātir jamā hue mutlaq

ise to ḳhat kahūñ yā sabza yā sitam kī kitāb

shab-e-firāq se terī gayā huuñ sab kuchh bhuul

viqāya kanz-o-hidāya sabhī ilam kī kitāb

huā ba-madrasa-e-ishq jab se tālib-e-ilm

bahut hai apne mutāla ko ek dam kī kitāb

na barhaman huuñ na mullā na maulvī na atiit

jo pothī dair kī pān.cho o yā haram kī kitāb

kitāb-e-husn kī 'qāsim-alī' mutāla kar

banā.ī sān.e.a ne san.at se yak-qalam kī kitāb

kuchh apne kaam nahin aawe jam-e-jam ki kitab

kifayat apne ko bas ek apne gham ki kitab

nahin KHayal siwa us ke aur hai dil mein

jo maktab ishq mein jaise paDha sanam ki kitab

KHat aane se nahin KHatir jama hue mutlaq

ise to KHat kahun ya sabza ya sitam ki kitab

shab-e-firaq se teri gaya hun sab kuchh bhul

wiqaya kanz-o-hidaya sabhi ilam ki kitab

hua ba-madrasa-e-ishq jab se talib-e-ilm

bahut hai apne mutala ko ek dam ki kitab

na barhaman hun na mulla na maulwi na atit

jo pothi dair ki pancho o ya haram ki kitab

kitab-e-husn ki 'qasim-ali' mutala kar

banai sanea ne sanat se yak-qalam ki kitab