kuchh barae saqi-e-gulfam pi leta hun main

kuchh barā.e sāqī-e-gulfām pī letā huuñ maiñ

kuchh ba-isrār-e-lab-e-mādām pī letā huuñ maiñ

kuchh ba-nām-e-'ġhālib'-o-'josh'-o-'jigar' 'faiz'-o-'adam'

kuchh bayād-e-hāfiz-o-ḳhayyām pī letā huuñ maiñ

az-sar-e-nau sar pe bāloñ ko ugāne ke liye

hasb-e-nusḳha roġhan-e-bādām pī letā huuñ maiñ

mai-kade meñ jab bhī piitā huuñ kabhī zāhid ke saath

bil adā kartā hai vo be-dām pī letā huuñ maiñ

vādī-e-kashmīr kī rañgīniyoñ kī yaad meñ

chaa.e ke uble gulābī jaam pī letā huuñ maiñ

jab kabhī bulbul mujhe hotā hai nazla aur zukām

bas zarā do ghūñT vaqt-e-shām pī letā huuñ maiñ

kuchh barae saqi-e-gulfam pi leta hun main

kuchh ba-israr-e-lab-e-madam pi leta hun main

kuchh ba-nam-e-'ghaalib'-o-'josh'-o-'jigar' 'faiz'-o-'adam'

kuchh bayaad-e-hafiz-o-KHayyam pi leta hun main

az-sar-e-nau sar pe baalon ko ugane ke liye

hasb-e-nusKHa roghan-e-baadam pi leta hun main

mai-kade mein jab bhi pita hun kabhi zahid ke sath

bil ada karta hai wo be-dam pi leta hun main

wadi-e-kashmir ki ranginiyon ki yaad mein

chae ke uble gulabi jam pi leta hun main

jab kabhi bulbul mujhe hota hai nazla aur zukaam

bas zara do ghunT waqt-e-sham pi leta hun main