kuchh bas na chala jazba-e-KHud-kaam ke aage

kuchh bas na chalā jazba-e-ḳhud-kām ke aage

jhuknā hī paḌā us but-e-badnām ke aage

ik aur bhī hasrat hai pas-e-hasrat-e-dīdār

ik aur bhī āġhāz hai anjām ke aage

aa aur idhar koī tajallī kī kiran pheñk

baiThe haiñ gadā tere dar-o-bām ke aage

ye 'ishq hai bāzīcha-e-atfāl nahīñ hai

kuchh aur bhī hai kūcha-e-asnām ke aage

yuuñ un kī jafāoñ se milī ham ko basīrat

ham jhuk na sake gardish-e-ayyām ke aage

din Dhalne lagā dil-zadagāñ dil kī ḳhabar lo

ik silsila-e-hijr bhī hai shaam ke aage

ab kuchh bhī nahīñ hāsil-e-tadbīr-e-mohabbat

ab kuchh bhī nahīñ nāma-o-paiġhām ke aage

ik sehr sā taarī thā 'zahīr' ahl-e-ḳhirad par

the mohr-ba-lab husn-e-dil-ārām ke aage

kuchh bas na chala jazba-e-KHud-kaam ke aage

jhukna hi paDa us but-e-badnam ke aage

ek aur bhi hasrat hai pas-e-hasrat-e-didar

ek aur bhi aaghaz hai anjam ke aage

aa aur idhar koi tajalli ki kiran phenk

baiThe hain gada tere dar-o-baam ke aage

ye 'ishq hai bazicha-e-atfal nahin hai

kuchh aur bhi hai kucha-e-asnam ke aage

yun un ki jafaon se mili hum ko basirat

hum jhuk na sake gardish-e-ayyam ke aage

din Dhalne laga dil-zadagan dil ki KHabar lo

ek silsila-e-hijr bhi hai sham ke aage

ab kuchh bhi nahin hasil-e-tadbir-e-mohabbat

ab kuchh bhi nahin nama-o-paigham ke aage

ek sehr sa tari tha 'zahir' ahl-e-KHirad par

the mohr-ba-lab husn-e-dil-aram ke aage