kuchh bhi na jab dikhai de tab dekhta hun main

kuchh bhī na jab dikhā.ī de tab dekhtā huuñ maiñ

phir bhī ye ḳhauf sā hai ki sab dekhtā huuñ maiñ

āñkheñ tumhāre haath pe rakh kar maiñ chal diyā

ab tum pe munhasir hai ki kab dekhtā huuñ maiñ

aahaT aqab se aa.ī aur aage nikal ga.ī

jo pahle dekhnā thā vo ab dekhtā huuñ maiñ

ye vaqt bhī batātā hai ādāb-e-vaqt bhī

is TūTte sitāre ko jab dekhtā huuñ maiñ

ab yaañ se kaun de mirī chashm-e-talab ko daad

jis fāsle se bāb-e-talab dekhtā huuñ maiñ

in putliyoñ kā qarz chukātā huuñ kyā karūñ

bas dil se dil milātā huuñ jab dekhtā huuñ maiñ

nākām-e-ishq huuñ so mirā dekhnā bhī dekh

kam dekhtā huuñ aur ġhazab dekhtā huuñ maiñ

kuchh bhi na jab dikhai de tab dekhta hun main

phir bhi ye KHauf sa hai ki sab dekhta hun main

aankhen tumhaare hath pe rakh kar main chal diya

ab tum pe munhasir hai ki kab dekhta hun main

aahaT aqab se aai aur aage nikal gai

jo pahle dekhna tha wo ab dekhta hun main

ye waqt bhi batata hai aadab-e-waqt bhi

is TuTte sitare ko jab dekhta hun main

ab yan se kaun de meri chashm-e-talab ko dad

jis fasle se bab-e-talab dekhta hun main

in putliyon ka qarz chukata hun kya karun

bas dil se dil milata hun jab dekhta hun main

nakaam-e-ishq hun so mera dekhna bhi dekh

kam dekhta hun aur ghazab dekhta hun main