kuchh bhi na uski zinat-o-zebai se hua

kuchh bhī na us kī zīnat-o-zebā.ī se huā

jitnā fasād hai mirī yaktā.ī se huā

lagtā hai itnā vaqt mire Dūbne meñ kyuuñ

andāza mujh ko ḳhvāb kī gahrā.ī se huā

lāzim thā jast bharne kī ḳhātir ye kaam bhī

vāqif maiñ apne aap kā paspā.ī se huā

kaafī thā yuuñ to rañg-e-tamāshā ba-zāt-e-ḳhud

jo bach rahā vo kaam tamāshā.ī se huā

huuñ kis qadar kisī ke shumār o qatār meñ

zāhir vahāñ pe apnī pazīrā.ī se huā

kamzoriyāñ hamārī huiiñ vā-shgāf jab

apnā bhī hashr puurī tavānā.ī se huā

jo asl chiiz thī vo chhupī rah ga.ī kahīñ

kuchh fā.eda na hāshiya-ārā.ī se huā

khulnā thā apne aib o hunar kā bharam kahāñ

ye bhī huā to qāfiya-paimā.ī se huā

hañgāma garm hai jo mire chār-sū 'zafar'

so bhī hujūm se nahīñ tanhā.ī se huā

kuchh bhi na us ki zinat-o-zebai se hua

jitna fasad hai meri yaktai se hua

lagta hai itna waqt mere Dubne mein kyun

andaza mujh ko KHwab ki gahrai se hua

lazim tha jast bharne ki KHatir ye kaam bhi

waqif main apne aap ka paspai se hua

kafi tha yun to rang-e-tamasha ba-zat-e-KHud

jo bach raha wo kaam tamashai se hua

hun kis qadar kisi ke shumar o qatar mein

zahir wahan pe apni pazirai se hua

kamzoriyan hamari huin wa-shgaf jab

apna bhi hashr puri tawanai se hua

jo asl chiz thi wo chhupi rah gai kahin

kuchh faeda na hashiya-arai se hua

khulna tha apne aib o hunar ka bharam kahan

ye bhi hua to qafiya-paimai se hua

hangama garm hai jo mere chaar-su 'zafar'

so bhi hujum se nahin tanhai se hua