kuchh der sadgi ke tasawwur se haT ke dekh

kuchh der sādgī ke tasavvur se haT ke dekh

likkhā huā varaq huuñ mujhe phir ulaT ke dekh

maanā ki tujh se koī ta.alluq nahīñ magar

ik baar dushmanoñ kī tarah hī palaT ke dekh

phir pūchhnā ki kaise bhaTaktī hai zindagī

pahle kisī patañg kī mānind kaT ke dekh

tā umr phir na hogī ujāloñ kī aarzū

tū bhī kisī charāġh kī lau se lipaT ke dekh

sajde tujhe karegī kisī roz ḳhud hayāt

bāñhoñ meñ hādsāt-e-jahāñ kī simaT ke dekh

tanhā.iyoñ meñ saikḌoñ sāthī bhī haiñ 'nazīr'

hai shart apnī zaat ke hissoñ meñ baT ke dekh

kuchh der sadgi ke tasawwur se haT ke dekh

likkha hua waraq hun mujhe phir ulaT ke dekh

mana ki tujh se koi talluq nahin magar

ek bar dushmanon ki tarah hi palaT ke dekh

phir puchhna ki kaise bhaTakti hai zindagi

pahle kisi patang ki manind kaT ke dekh

ta umr phir na hogi ujalon ki aarzu

tu bhi kisi charagh ki lau se lipaT ke dekh

sajde tujhe karegi kisi roz KHud hayat

banhon mein hadsat-e-jahan ki simaT ke dekh

tanhaiyon mein saikDon sathi bhi hain 'nazir'

hai shart apni zat ke hisson mein baT ke dekh