kuchh din guzre aali-sahib aali-ji kahlate the

kuchh din guzre 'ālī'-sāhib ālī-jī kahlāte the

mahfil mahfil qarya qarya sher sunāte jaate the

qadr-e-suḳhan ham kyā jāneñ haañ rañg-e-suḳhan kuchh aisā thā

achchhe achchhe kahne vaale apne paas biThāte the

ġhazloñ meñ sau rañg milā kar apnā rañg ubhārā thā

ustādoñ ke saa.e meñ kuchh apnī raah banāte the

gītoñ meñ kuchh aur na ho ik kaifiyat sī rahtī thī

jab bhī misre raqsāñ hote ma.anī saaz bajāte the

dohe kahne aur paḌhne kā aisā tarz nikālā thā

sunñe vaale sar dhunte the aur pahroñ paḌhvāte the

sāmne baiThī sundar nāreñ aap talab ban jaatī thiiñ

pardoñ meñ se farmā.ish ke sau sau parche aate the

''ġhazleñ dohe gīt'' kī shohrat mulk se bāhar phailī thī

hindostāñ se aane vaale tohfoñ meñ le jaate the

ahl-e-hunar kī ḳhosha-chīnī un ko vaj.h-e-sa.ādat thī

be-hunaroñ meñ apnī anā kā parcham bhī lahrāte the

phir dekhā ki bachcha bachcha hañstā thā aur 'ālī'-jī

fardeñ likhte masleñ paḌhte baiThe gilD chalāte the

kuchh din guzre 'ali'-sahib aali-ji kahlate the

mahfil mahfil qarya qarya sher sunate jate the

qadr-e-suKHan hum kya jaanen han rang-e-suKHan kuchh aisa tha

achchhe achchhe kahne wale apne pas biThate the

ghazlon mein sau rang mila kar apna rang ubhaara tha

ustadon ke sae mein kuchh apni rah banate the

giton mein kuchh aur na ho ek kaifiyat si rahti thi

jab bhi misre raqsan hote mani saz bajate the

dohe kahne aur paDhne ka aisa tarz nikala tha

sunne wale sar dhunte the aur pahron paDhwate the

samne baiThi sundar naren aap talab ban jati thin

pardon mein se farmaish ke sau sau parche aate the

ghazlen dohe git ki shohrat mulk se bahar phaili thi

hindostan se aane wale tohfon mein le jate the

ahl-e-hunar ki KHosha-chini un ko wajh-e-saadat thi

be-hunaron mein apni ana ka parcham bhi lahraate the

phir dekha ki bachcha bachcha hansta tha aur 'ali'-ji

farden likhte maslen paDhte baiThe gilD chalate the