kuchh dinon apne ghar raha hun main

kuchh dinoñ apne ghar rahā huuñ maiñ

aur phir dar-ba-dar rahā huuñ maiñ

dūsroñ kī ḳhabar to kyā letā

ḳhud se bhī be-ḳhabar rahā huuñ maiñ

vaqt go ham-safar na thā merā

vaqt kā ham-safar rahā huuñ maiñ

zīna-e-zāt kā safar aur raat

dhīre dhīre utar rahā huuñ maiñ

yak-ba-yak kis tarah badal jā.ūñ

rafta rafta sudhar rahā huuñ maiñ

tū bhī dekhe to ajnabī jaane

ab ke vo svāñg bhar rahā huuñ maiñ

be-haqīqat hai shor-e-shahr ki ab

gungunātā guzar rahā huuñ maiñ

aag hai aur sulag rahī hai hayāt

raakh huuñ aur bikhar rahā huuñ maiñ

kuchh dinon apne ghar raha hun main

aur phir dar-ba-dar raha hun main

dusron ki KHabar to kya leta

KHud se bhi be-KHabar raha hun main

waqt go ham-safar na tha mera

waqt ka ham-safar raha hun main

zina-e-zat ka safar aur raat

dhire dhire utar raha hun main

yak-ba-yak kis tarah badal jaun

rafta rafta sudhar raha hun main

tu bhi dekhe to ajnabi jaane

ab ke wo swang bhar raha hun main

be-haqiqat hai shor-e-shahr ki ab

gungunata guzar raha hun main

aag hai aur sulag rahi hai hayat

rakh hun aur bikhar raha hun main