kuchh gham-e-jaanan kuchh gham-e-dauran donon meri zat ke nam

kuchh ġham-e-jānāñ kuchh ġham-e-daurāñ donoñ merī zaat ke naam

ek ġhazal mansūb hai us se ek ġhazal hālāt ke naam

mauj-e-balā dīvār-e-shahr pe ab tak jo kuchh likhtī rahī

merī kitāb-e-zīst ko paḌhiye darj haiñ sab sadmāt ke naam

girte ḳheme jaltī tanābeñ aag kā dariyā ḳhuun kī nahr

aise munazzam mansūboñ ko duuñ kaise āfāt ke naam

us kī galī se maqtal-e-jāñ tak masjid se mai-ḳhāne tak

uljhan pyaas ḳhalish tanhā.ī karb-zada lamhāt ke naam

sahrā zindāñ tauq salāsil ātish zahr aur daar o rasan

kyā kyā ham ne de rakhe haiñ aap ke ehsānāt ke naam

raushan chehra bhīgī zulfeñ duuñ kis ko kis par tarjīh

ek qasīda dhuup kā likkhūñ ek ġhazal barsāt ke naam

jin ke liye mar mar ke jiye ham kyā paayā un se 'manzūr'

kuchh rusvā.ī kuchh badnāmī ham ko milī sauġhāt ke naam

kuchh gham-e-jaanan kuchh gham-e-dauran donon meri zat ke nam

ek ghazal mansub hai us se ek ghazal haalat ke nam

mauj-e-bala diwar-e-shahr pe ab tak jo kuchh likhti rahi

meri kitab-e-zist ko paDhiye darj hain sab sadmat ke nam

girte KHeme jalti tanaben aag ka dariya KHun ki nahr

aise munazzam mansubon ko dun kaise aafat ke nam

us ki gali se maqtal-e-jaan tak masjid se mai-KHane tak

uljhan pyas KHalish tanhai karb-zada lamhat ke nam

sahra zindan tauq salasil aatish zahr aur dar o rasan

kya kya hum ne de rakhe hain aap ke ehsanat ke nam

raushan chehra bhigi zulfen dun kis ko kis par tarjih

ek qasida dhup ka likkhun ek ghazal barsat ke nam

jin ke liye mar mar ke jiye hum kya paya un se 'manzur'

kuchh ruswai kuchh badnami hum ko mili saughat ke nam