kuchh hunar aur samajhte hain na fan jaante hain

kuchh hunar aur samajhte haiñ na fan jānte haiñ

ham tire zikr ko shāyān-e-suḳhan jānte haiñ

ruuh kī ġhāyat-e-ulvī kā na ho andāza

ham magar maqsad-e-taḳhlīq-e-badan jānte haiñ

isti.āre haiñ tire āriz-o-chashm-o-lab ke

ye hadīs-e-gul-o-shahlā-o-saman jānte haiñ

ye alag baat nahīñ aa.ī zamāna-sāzī

ham magar ḳhuub zamāne kā chalan jānte haiñ

raqs zanjīr ke āhang pe hotā hai sivā

ramz lekin ye kahāñ zamzama-zan jānte haiñ

bāġhbāñ bhī hai tasarruf meñ sharīk-e-gulchīñ

is haqīqat ko koī ahl-e-chaman jānte haiñ

lafz-o-taḳh.īl ko jo kar na sake ham-āhañg

'shaukat' us shaḳhs ko ham fāriġh-e-fan jānte haiñ

kuchh hunar aur samajhte hain na fan jaante hain

hum tere zikr ko shayan-e-suKHan jaante hain

ruh ki ghayat-e-ulwi ka na ho andaza

hum magar maqsad-e-taKHliq-e-badan jaante hain

istiare hain tere aariz-o-chashm-o-lab ke

ye hadis-e-gul-o-shahla-o-saman jaante hain

ye alag baat nahin aai zamana-sazi

hum magar KHub zamane ka chalan jaante hain

raqs zanjir ke aahang pe hota hai siwa

ramz lekin ye kahan zamzama-zan jaante hain

baghban bhi hai tasarruf mein sharik-e-gulchin

is haqiqat ko koi ahl-e-chaman jaante hain

lafz-o-taKHil ko jo kar na sake ham-ahang

'shaukat' us shaKHs ko hum farigh-e-fan jaante hain