kuchh is ada se mohabbat-shanas hona hai

kuchh is adā se mohabbat-shanās honā hai

ḳhushī ke baab meñ mujh ko udaas honā hai

maiñ aaj sog manānā sikhāne vaalā huuñ

idhar ko aa.eñ jinheñ mahv-e-yās honā hai

nashist-e-rūh meñ pākīzgī hai shart magar

badan kī bazm meñ bas ḳhush-libās honā hai

maiñ ḳhud hī hotā huuñ apnī nashāt kā baa.is

so mujh ko ḳhud mire ġham kī asaas honā hai

azal se merī hifāzat kā farz hai un par

sabhī dukhoñ ko mere ās-pās honā hai

ye āshiqī tire bas kī nahīñ so rahne de

ki terā kaam to bas nā-sipās honā hai

kuchh is ada se mohabbat-shanas hona hai

KHushi ke bab mein mujh ko udas hona hai

main aaj sog manana sikhane wala hun

idhar ko aaen jinhen mahw-e-yas hona hai

nashist-e-ruh mein pakizgi hai shart magar

badan ki bazm mein bas KHush-libas hona hai

main KHud hi hota hun apni nashat ka bais

so mujh ko KHud mere gham ki asas hona hai

azal se meri hifazat ka farz hai un par

sabhi dukhon ko mere aas-pas hona hai

ye aashiqi tere bas ki nahin so rahne de

ki tera kaam to bas na-sipas hona hai