kuchh is ada se wo mere dil-o-nazar mein raha

kuchh is adā se vo mere dil-o-nazar meñ rahā

ba-qaid-e-hosh bhī maiñ ālam-e-digar meñ rahā

ḳhud apnī zaat pe mujh ko bhī iḳhtiyār na thā

tamām-umr maiñ ik halqa-e-asar meñ rahā

vo ishq jis kī zamāne ko bhī ḳhabar na rahī

tire bichhaḌne se rusvā nagar nagar meñ rahā

rah-e-hayāt meñ terī rifāqateñ na sahī

tirā ḳhayāl to har-dam mujhe safar meñ rahā

ġham-e-zamāna ne kis ko mafar hai ai 'nādir'

sukūn-e-qalb kahāñ ab kisī hunar meñ rahā

kuchh is ada se wo mere dil-o-nazar mein raha

ba-qaid-e-hosh bhi main aalam-e-digar mein raha

KHud apni zat pe mujh ko bhi iKHtiyar na tha

tamam-umr main ek halqa-e-asar mein raha

wo ishq jis ki zamane ko bhi KHabar na rahi

tere bichhaDne se ruswa nagar nagar mein raha

rah-e-hayat mein teri rifaqaten na sahi

tera KHayal to har-dam mujhe safar mein raha

gham-e-zamana ne kis ko mafar hai ai 'nadir'

sukun-e-qalb kahan ab kisi hunar mein raha