kuchh is tarah gham-e-ulfat ki kaenat luTi

kuchh is tarah ġham-e-ulfat kī kā.enāt luTī

mirī zabān se niklī har ek baat luTī

qazā zarūr thī aanī magar zahe taqdīr

jahāñ meñ husn ke hāthoñ mirī hayāt luTī

ḳhabar huī kisī mad.hosh-e-aish ko na zarā

hamārī bazm-e-tamannā tamām raat luTī

tabāh-e-ishq haiñ bulbul chakor parvāna

rah-e-jahāñ meñ na sirf aadmī kī zaat luTī

na jaam hai na surāhī hai dekh ai saaqī

mire na hone se bazm-e-takallufāt luTī

mujhe to luuT liyā 'ashk' ranj-o-ġham ne magar

mirī kisī se na bazm-e-taḳhayyulāt luTī

kuchh is tarah gham-e-ulfat ki kaenat luTi

meri zaban se nikli har ek baat luTi

qaza zarur thi aani magar zahe taqdir

jahan mein husn ke hathon meri hayat luTi

KHabar hui kisi madhosh-e-aish ko na zara

hamari bazm-e-tamanna tamam raat luTi

tabah-e-ishq hain bulbul chakor parwana

rah-e-jahan mein na sirf aadmi ki zat luTi

na jam hai na surahi hai dekh ai saqi

mere na hone se bazm-e-takallufat luTi

mujhe to luT liya 'ashk' ranj-o-gham ne magar

meri kisi se na bazm-e-taKHayyulat luTi