kuchh is tarah teri tafsir kar rahe hain hum

kuchh is tarah tirī tafsīr kar rahe haiñ ham

chhalakte jaam ko tasvīr kar rahe haiñ ham

hamāre bachchoñ ke sar māñgtī haiñ buniyādeñ

ye kaise shahr kī tā'mīr kar rahe haiñ ham

vo duur raah meñ insāñ na jal rahā ho koī

jise charāġh se tā'bīr kar rahe haiñ ham

tum apne zaḳhmoñ kā koī hisāb mat rakhnā

bayāz-e-qalb pe tahrīr kar rahe haiñ ham

tirī ḳhirad ko kisī din jakaḌ ke rakh deñge

abhī junūn ko zanjīr kar rahe haiñ ham

hai kaisā karb ki apnī hī sarzamīn pe 'qais'

difā'-e-sunnat-e-shabbīr kar rahe haiñ ham

kuchh is tarah teri tafsir kar rahe hain hum

chhalakte jam ko taswir kar rahe hain hum

hamare bachchon ke sar mangti hain buniyaaden

ye kaise shahr ki ta'mir kar rahe hain hum

wo dur rah mein insan na jal raha ho koi

jise charagh se ta'bir kar rahe hain hum

tum apne zaKHmon ka koi hisab mat rakhna

bayaz-e-qalb pe tahrir kar rahe hain hum

teri KHirad ko kisi din jakaD ke rakh denge

abhi junun ko zanjir kar rahe hain hum

hai kaisa karb ki apni hi sarzamin pe 'qais'

difa'-e-sunnat-e-shabbir kar rahe hain hum