kuchh ishaare the jinhen duniya samajh baiThe the hum

kuchh ishāre the jinheñ duniyā samajh baiThe the ham

us nigāh-e-āshnā ko kyā samajh baiThe the ham

rafta rafta ġhair apnī hī nazar meñ ho ga.e

vāh-rī ġhaflat tujhe apnā samajh baiThe the ham

hosh kī taufīq bhī kab ahl-e-dil ko ho sakī

ishq meñ apne ko dīvāna samajh baiThe the ham

parda-e-āzurdagī meñ thī vo jān-e-iltifāt

jis adā ko ranjish-e-bejā samajh baiThe the ham

kyā kaheñ ulfat meñ rāz-e-be-hisī kyūñkar khulā

har nazar ko terī dard-afzā samajh baiThe the ham

be-niyāzī ko tirī paayā sarāsar soz o dard

tujh ko ik duniyā se begāna samajh baiThe the ham

inqalāb-e-pai-ba-pai har gardish o har daur meñ

is zamīn o āsmāñ ko kyā samajh baiThe the ham

bhuul baiThī vo nigāh-e-nāz ahd-e-dostī

us ko bhī apnī tabī.at kā samajh baiThe the ham

saaf alag ham ko junūn-e-āshiqī ne kar diyā

ḳhud ko tere dard kā pardā samajh baiThe the ham

kaan bajte haiñ mohabbat ke sukūt-e-nāz ko

dāstāñ kā ḳhatm ho jaanā samajh baiThe the ham

bātoñ bātoñ meñ payām-e-marg bhī aa hī gayā

un nigāhoñ ko hayāt-afzā samajh baiThe the ham

ab nahīñ tāb-e-sipās-e-husn is dil ko jise

be-qrār-e-shikva-e-bejā samajh baiThe the ham

ek duniyā dard kī tasvīr niklī ishq ko

koh-kan aur qais kā qissa samajh baiThe the ham

rafta rafta ishq mānūs-e-jahāñ hotā chalā

ḳhud ko tere hijr meñ tanhā samajh baiThe the ham

husn ko ik husn hī samjhe nahīñ aur ai 'firāq'

mehrbāñ nā-mehrbāñ kyā kyā samajh baiThe the ham

kuchh ishaare the jinhen duniya samajh baiThe the hum

us nigah-e-ashna ko kya samajh baiThe the hum

rafta rafta ghair apni hi nazar mein ho gae

wah-ri ghaflat tujhe apna samajh baiThe the hum

hosh ki taufiq bhi kab ahl-e-dil ko ho saki

ishq mein apne ko diwana samajh baiThe the hum

parda-e-azurdagi mein thi wo jaan-e-iltifat

jis ada ko ranjish-e-beja samajh baiThe the hum

kya kahen ulfat mein raaz-e-be-hisi kyunkar khula

har nazar ko teri dard-afza samajh baiThe the hum

be-niyazi ko teri paya sarasar soz o dard

tujh ko ek duniya se begana samajh baiThe the hum

inqalab-e-pai-ba-pai har gardish o har daur mein

is zamin o aasman ko kya samajh baiThe the hum

bhul baiThi wo nigah-e-naz ahd-e-dosti

us ko bhi apni tabiat ka samajh baiThe the hum

saf alag hum ko junun-e-ashiqi ne kar diya

KHud ko tere dard ka parda samajh baiThe the hum

kan bajte hain mohabbat ke sukut-e-naz ko

dastan ka KHatm ho jaana samajh baiThe the hum

baaton baaton mein payam-e-marg bhi aa hi gaya

un nigahon ko hayat-afza samajh baiThe the hum

ab nahin tab-e-sipas-e-husn is dil ko jise

be-qrar-e-shikwa-e-beja samajh baiThe the hum

ek duniya dard ki taswir nikli ishq ko

koh-kan aur qais ka qissa samajh baiThe the hum

rafta rafta ishq manus-e-jahan hota chala

KHud ko tere hijr mein tanha samajh baiThe the hum

husn ko ek husn hi samjhe nahin aur ai 'firaq'

mehrban na-mehrban kya kya samajh baiThe the hum