kuchh kaam nahin hai yahan wahshat ke barabar

kuchh kaam nahīñ hai yahāñ vahshat ke barābar

so tum hameñ ġham do koī himmat ke barābar

kab lagtā hai jī rāh-e-sahūlat meñ hamesha

aur miltā hai kab rañj zarūrat ke barābar

āsā.ish-o-ārām ho yā jāh-o-hasham ho

kyā chiiz yahāñ par hai mohabbat ke barābar

gunjā.ish-e-afsos nikal aatī hai har roz

masrūf nahīñ rahtā huuñ fursat ke barābar

bhar laa.e haiñ ham aañkh meñ rakhne ko muqābil

ik ḳhvāb-e-tamannā tirī ġhaflat ke barābar

rakh deñge tire paañv meñ ham mauj meñ aa kar

duniyā hai kahāñ jaan kī qīmat ke barābar

phir kashmakash-e-sūd-o-ziyāñ kār-e-ziyāñ hai

jab jiit bhī Thahrī hai hazīmat ke barābar

jiine meñ jo ehsās-e-tafāḳhur hai kahāñ hai

jiite chale jaane kī nadāmat ke barābar

kuchh kaam nahin hai yahan wahshat ke barabar

so tum hamein gham do koi himmat ke barabar

kab lagta hai ji rah-e-sahulat mein hamesha

aur milta hai kab ranj zarurat ke barabar

aasaish-o-aram ho ya jah-o-hasham ho

kya chiz yahan par hai mohabbat ke barabar

gunjaish-e-afsos nikal aati hai har roz

masruf nahin rahta hun fursat ke barabar

bhar lae hain hum aankh mein rakhne ko muqabil

ek KHwab-e-tamanna teri ghaflat ke barabar

rakh denge tere panw mein hum mauj mein aa kar

duniya hai kahan jaan ki qimat ke barabar

phir kashmakash-e-sud-o-ziyan kar-e-ziyan hai

jab jit bhi Thahri hai hazimat ke barabar

jine mein jo ehsas-e-tafaKHur hai kahan hai

jite chale jaane ki nadamat ke barabar