kuchh kar-e-anasir tah-e-dariya bhi ajab hai

kuchh kār-e-anāsir tah-e-dariyā bhī ajab hai

is ḳhaak meñ pinhāñ koī sho.ala bhī ajab hai

duniyā se kuchh aisā bhī nahīñ rabt hamārā

sunte haiñ magar lazzat-e-duniyā bhī ajab hai

hai dil hī kisī ārzū-e-vasl kā maskan

dil kā magar is raah pe aanā bhī ajab hai

vo diid hai ab ālam-e-maujūd se aage

is sā.at-e-mas.ūd kā dhokā bhī ajab hai

tai hotī chalī jaatī hai be-faiz masāfat

is raah meñ dīvār kā aanā bhī ajab hai

khiltā nazar aatā hī nahīñ hai gul-e-umīd

jaatā hī nahīñ dil se ye dhaḌkā bhī ajab hai

is ziist pe sahrā kā gumāñ tak nahīñ hotā

ai naḳhl-e-mohabbat tirā saaya bhī ajab hai

kuchh kar-e-anasir tah-e-dariya bhi ajab hai

is KHak mein pinhan koi shoala bhi ajab hai

duniya se kuchh aisa bhi nahin rabt hamara

sunte hain magar lazzat-e-duniya bhi ajab hai

hai dil hi kisi aarzu-e-wasl ka maskan

dil ka magar is rah pe aana bhi ajab hai

wo did hai ab aalam-e-maujud se aage

is saat-e-masud ka dhoka bhi ajab hai

tai hoti chali jati hai be-faiz masafat

is rah mein diwar ka aana bhi ajab hai

khilta nazar aata hi nahin hai gul-e-umid

jata hi nahin dil se ye dhaDka bhi ajab hai

is zist pe sahra ka guman tak nahin hota

ai naKHl-e-mohabbat tera saya bhi ajab hai