kuchh kam nahin hain shama se dil ki lagan mein hum

kuchh kam nahīñ haiñ sham.a se dil kī lagan meñ ham

fānūs meñ vo jaltī hai yaañ pairahan meñ ham

haiñ tufta-jāñ mufāraqat-e-gul-badan meñ ham

aisā na ho ki aag lagā deñ chaman meñ ham

gum hoñge bū-e-zulf-e-shikan-dar-shikan meñ ham

qabza kareñge chiin ko le kar ḳhutan meñ ham

gar ye hī chheḌ dast-e-junūñ kī rahī to bas

mar kar bhī siina chaak kareñge kafan meñ ham

mahv-e-ḳhayāl-e-zulf-e-butāñ umr bhar rahe

mash.hūr kyuuñ na hoñ kaho dīvāna-pan meñ ham

hoñge aziiz ḳhalq kī nazroñ meñ dekhnā

gir kar bhī apne yaar ke chāh-e-zaqan meñ ham

chhakke hī chhūT jā.eñge ġhairoñ ke dekhnā

aa nikle haañ kabhī jo tirī anjuman meñ ham

ai andalīb dāva-e-behūda par kahīñ

ek aadh gul kā muñh na masal deñ chaman meñ ham

āshiq hue haiñ parda-nashīñ par bas is liye

rakhte haiñ soz-e-ishq nihāñ jaan o tan meñ ham

zālim kī sach masal hai ki rassī darāz hai

misdāq us kā paate haiñ charḳh-e-kuhan meñ ham

anqā kā 'aish' naam to hai go nishāñ nahīñ

yaañ vo bhī kho chuke haiñ talāsh-e-dahan meñ ham

kuchh kam nahin hain shama se dil ki lagan mein hum

fanus mein wo jalti hai yan pairahan mein hum

hain tufta-jaan mufaraqat-e-gul-badan mein hum

aisa na ho ki aag laga den chaman mein hum

gum honge bu-e-zulf-e-shikan-dar-shikan mein hum

qabza karenge chin ko le kar KHutan mein hum

gar ye hi chheD dast-e-junun ki rahi to bas

mar kar bhi sina chaak karenge kafan mein hum

mahw-e-KHayal-e-zulf-e-butan umr bhar rahe

mashhur kyun na hon kaho diwana-pan mein hum

honge aziz KHalq ki nazron mein dekhna

gir kar bhi apne yar ke chah-e-zaqan mein hum

chhakke hi chhuT jaenge ghairon ke dekhna

aa nikle han kabhi jo teri anjuman mein hum

ai andalib dawa-e-behuda par kahin

ek aadh gul ka munh na masal den chaman mein hum

aashiq hue hain parda-nashin par bas is liye

rakhte hain soz-e-ishq nihan jaan o tan mein hum

zalim ki sach masal hai ki rassi daraaz hai

misdaq us ka pate hain charKH-e-kuhan mein hum

anqa ka 'aish' nam to hai go nishan nahin

yan wo bhi kho chuke hain talash-e-dahan mein hum